'Armanc ji destdirêjiyên Tirkiyê dirêjkirina temenê DAIŞ'ê ye'

GIRÊ SPÎ

Meclîsa kantona Girê Spî îro di bin durişmeya "Em aştixwaz in û kuştina bêsûcan qebûl nakin" de civîneke girseyî lidar xist û têde geşedanên dawî li Sûriyê û herêmê hate nirxandin.

Di civînê ku li akademiya şehîd Emar El-Hesen a perwerdeya fikrî hatibû lidarxistin de bi sedan rûspî û şêxên eşîrên herêmê û endamên meclîs û rêveberiyên kantonê hejmareke welatiyan beşdar bûn.

Di civînê de her wiha Seroka Desteya Rêveber a Meclîsa Sûriya Demokratîk (MSD) Îlham Ehmed beşdar bû û der barê geşedanên dawî yên qada Sûriyê û bi taybet Bakurê Sûriyê de axivî.

Îlham Ehmed di axaftina xwe de behsa êrîşên artêşa Tirk a dagirker de ku di van demên dawî de pêk hatine kir û got ku evan êrîş ne tiştekî nû ye û wiha anî ziman: "Dewleta Tirk her tim dixwaze ewlehiya li Bakurê Sûriyê û giştî Sûriyê têk bibe. beriya niha jî li parêzgehên Humis û Hemayê bi riya komên çete yên girêdayî wê heman destdirêjî dikir da ku berjewendî û çavbirçîbûna xwe di Sûriyê de pêk bîne."

Îlham Ehmed got ku hikûmeta Tirk bi çavekî dijminan li projeya demokratîk a Bakurê Sûriyê dinêre û bi van destdirêjî her tim hewl dide projeya demokratîk asteng bike û tevliheviyan li herêm derbixîne û wiha domand: "Dewleta Tirk hewl dide dagirkeriya xwe di axa Sûriyê de rewa bike û îdîa dike ku ew dixwaze zulma rêjîma Baasê ji ser welatiyan rabike, lê tişta ku eşkere ye Tirkiye berûvajî vê yekê dike û berhem û hilberîna Sûriyê talan dike."

Îlham Ehmed da zanîn ku Tirkiye bi van êrîşên xwe li dijî herêmên Bakurê Sûriyê hewl dide temenê DAIŞ'ê dirêjtir bike û alîkariyê bi çeteyan re dike da ku careke din li Îraq û Sûriyê belav bibin û ew jî berjewendiyên xwe li vir û wir pêk bîne.

Der barê mijara kuştina şêx Beşîr Feysel El-Hiwêdî de Îlham Ehmed got ku armanc ji vê kuştinê ew e ku pêkhateyên herêmê li dijî hevûdu bide şerkirin û da zanîn ku ji bo kujer bêne cezakirin lêpirsîn hêjî berdewam in.

Îlham Ehmed bêdengiya civaka navnetewî li hemberî van destdirêjiyan şermezar kir û axaftina xwe wiha bi dawî kir: "Deriyê me ji diyalogan re her tim vekirî ye da ku aloziya Sûriyê were çareserkirin û divê li ser bingeheke rasteqîn pêk were ango ne li gorî lihevhatinê û divê lihevkirineke giştî derbarê destûrê Sûriyê de pêk were da ku mafên hemû welatiyên Sûriyê bêne parastin."

ANHA