Şedadê şehîdên xwe oxir kirin

Di nava tilîliyên dayikan û dirûşmeyên silavkirina şehîdan de, bi sedan şêniyên navçeya Şedadê cenazeyên 4 şehîdên QSD`ê ku di pêngava Şerê Tunekirina Terorê de şehîd bûbûn, li Goristana Şehîdên Şedadê oxir kirin.

NÛÇE

3 mijdar, 2018 08:57

HESEKÊ

Şêniyan cenazeyên Ewad El-Hac (Hekmo), Esed El-Îsa (Nemir), Cemal Tirkî (Hemza) û Omer Ebdullah (Hesen) ji pêşiya Meclisa Saziya Malbatên Şehîdan li bajarê Hesekê wergirt û bi karwanekî trimpêlan birin Goristana Şehîdên Şedadê.

Li goristanê merasîmê bi deqeyeke rêzgirtinê û toraneke leşkerî dest pê kir. Paşê li ser navê Yekîneyên Parastina Gel (YPG) fermandar Hac Sayîl û li ser navê Saziya Malbatên Şehîdan Zehra Elî axivîn.

Axaftvanan sersaxî ji malbatên şehîdan re xwest. Axaftvanan destnîşan kir ku şehîdan ji bo azadiyê tiştê herî giranbuha dan û wiha got: "Bi saya wan me dikaribû gelek herêman rizgar bikin, ne ji wan bûya em niha ne li vir bûn."

Axaftvanan soz da ku dê heta dawiyê û pêkanîna armancên wan, li ser rêya şehîdan bin.

Paşê endama Saziya Malbatên Şehîdan Eyat Îbrahîm nasnameyên şehîdan xwendin û radestî malbatên şehîdan kirin. Hevalên şehîdan bi dirûşma “Şehîd namirin” her çar şehîd spartin axê.

(jo)

ANHA