Komploya li dijî Ocalan li Lubnanê hate şermezarkirin

BEYRÛT

Civîn bi pêşengtiya Tevgera Civaka Demokratîk (TEV-DEM) bi beşdarbûna bi dehan kurdên li Lubnanê jiyan dikin li avahiya Weqfeya Çandî û Civakî ya Newroz a li Beyrûtê, herêma Bîqai û herêma başûrê Lubnanê hatin lidarxistin.

Cihê civînan bi wêneyên Rêberê Gelê Kurd Abdullah Ocalan û al û sembolên Kurdî hatibû xemilandin.

Piştî rêzgirtinê, rêveberên TEV-DEM‘ê Beşîr Çawîş, Şervîn Cûdî û endamê Weqfeya Çand û Civakî ya Newroz Cemal Hesen û nûnerê Rêveberiya Xweser li Lubnanê Diyar Qamişlo axivîn.

Kesên axivîne anîn ziman ku dewletên komploger bi armanca têkbirîna şoreşa gelê Kurd di kesayta Ocalan komplo pêk anîn û ew radestî dewleta Tirk kirin.

Axaftivanan her wiha destnîşan kirin ku komploya hatî kirin fikrê azad û projeya demokratîk a ku Ocalan ji bo wê têkoşînê dike, dike hedef. Her wiha hate gotin ku Şoreşa Rojava û Bakurê Sûriyeyê bi pêkanîna projeya demokratîk û xwedîderketina li ramanê Ocalan komplo vala derxistin.

Di axaftinan de, tecrîdkirina Ocalan û bêndengiya raya giştî ya li hemberî binpêkirina dewleta Tirk hatin şermezarkirin û bang li gelên Kurdistanê hate kirin ku hevgirtina xwe xurt bikin û li hemberî dagirkeran bisekinin.

Civîn bi dirûşmeyên "Bijî Serok Apo" bi dawî bû.

ANHA