Ji bo bîranîna nivîskar Tewfîq Huseynî pêşangeha pirtûkan

QAMIŞLO

Pêşangeh ji bo bîranîna nivîskar û wergervanê Kurd Tewfîq Huseynî yê ku di 18'ê Çileya îsal de çûbû ser dilovaniya xwe, ji aliyê Navenda Hûrî ya Çand û Hunerê ya navçeya Amûdê ve hate vekirin

Nivîskar Tewfîq Huseynî 56 pirtûk bi zimanên Kurdî û Erebî nivîsandine û werger kirine.

Pêşangeh bi amadebûna bi dehan şêniyên navçeya Amûdê, nivîskar û rewşenbîr hate vekirin.

Di çalakiyên vekirinê de endamê Yekitiya Nivîskarên Kurd li Sûriyeyê yê herêma Cizîrê Dilawer Zenkî bi xêr hatine beşdaran kir û girîngiya pirtûk û xebatên wêjayî di vê dema heses de ku herêm tê re derbas dibe destnîşan kir .

Zenkî wiha got: "Gelek alî hewl didin nasname û çanda gelan biçewsînin. Ji ber wê divê nivîskar van êrîşan belge bikin û rola civakê bi pêş bixin."

Zinkî di berdewama axaftina xwe de diyar kir ku erka belavkirina çanda gelên herêmê destpêkê dikeve ser milê nivîskar û rewşenbîran û wiha anî ziman: " Berhemên nivîskaran niha ji bo me pir girîng in, da ku em ji cîhanê re xuya bikin ku hemû gelên herêmê ji bo hebûn û çanda xwe tê dikoşin."

Ji aliyê xwe ve hevserokê Navenda Hûrî ya Çand û Hunerê yê Amûdê Rêber Agirî axivî û destnîşan kir k u armanca pêşangehê ew e ku nivîskaran teşwîqî nivîsê bikin. Agirî hemû kesên ji bo xuyakirina çanda gelan ked dane bi bîr anî weke nivîskar Tewfîq Huseynî.

Di pêşengehê de 2 hezar û 500 pirtûk û çîrok ji berhemên nivîskarên Herêma Cizîrê bi her du zimanên Erebî û Kurdî hatin pêşkeşkirin.

Tê payîn ku pêşengeh dê du rojan bidome.

(şx)

ANHA