Li Reqayê amadekariyên zivistanê

FECIR EL-XALID - RUBA EL-ELÎ / REQA

Piştî rizgarkirina bajarê Reqayê ji çeteyên DAIŞ`ê ji hêla QSD`ê ve di 20`ê Cotmeha borî de, sûkên bajêr geş bûne. Gelek firoşkaran dikanên xwe ji nû ve vekirin. Bi hatina zivistanê re şêniyên Reqayê û gundewarên wê ji bo kirîna pêdiviyên zivistanê wekî soba û cil û bergên zivistanê herikîn sûkên bajêr.

Ji ber bikalîtabûna cil û bergan û nirxên wê yên guncaw şênî berê xwe didin dikanên Balê û cil û bergan dikirin. Ji milekî din ve şênî sobe û pêdiviyên zivistanê dikirin.

Belavkirina sobe û alîkariyê

Komîteya Karûbarên Civakî û Kar bi hevkariya rêxistinên ku li Reqayê dixebitin, alîkarî li mablatên hewcedar belav kir. Belavkirin bi rêya meclis û komînên tax û gundewarên Reqayê pêk tê.

Têkildarî mijarê her du rêxistinên Rojava û El-Mewde yên ku bin banê Buroya Rêxistinan a girêdayî Meclisa Sivîl a Reqayê kar dikin 2 hezar û 500 paketên xwarinê li taxa El-Nehda û gundewarên Reqayê belav kirin.

Bi nêzîkbûna zivistanê re Meclisa taxa El-Nehda û bi rêya komînan, hejmara malbatên xizan û hewcedar hijmartin û li gorî serjimariyê 700 malbat li taxên El-Huriyê, El-Firat, El-Tewesuiyê û El-Temînat El-Ictîmaiyê hatin tesbîtkirin. Her wiha xebatên belavkirinê li taxên El-Rimêlê û El-Mişleb têne meşandin. Beriya zivistanê rêxistinan xebatên belavkirina sobayan li malbatên hewcedar didomînin.

Belavkirina mazotê

Mazot bi rêya meclis û komînan dê were belavkirin. Girêdayî mijarê endamê rêveber ê stasyona Sadkobê Xelîl Ereb wiha got: "Ji bo wergirtina mazotê ji stasyonê dê komîteyek were avakirin û dê mazotê li şêniyan belav bike. Em wek rêveberiya Sadkobê xebatên belavkirinê dişopînin û em hemû giliyên şêniyan pêşwazî dikin. Ji bo her malbatekê 400 lître mazot hatiye diyarkirin û bi nirxek ji sûkê erzantir (ji her lîtreyekê 55 lîreyên Sûriyeyê) li ser du caran dê were belavkirin."

Hêjayî bibîrxistinê ye ku lîtreya mazotê li sûkên Reqayê û gundewarên wê ji 90 heta 100 lîreyên Sûriyeyê ye.

(şx)

ANHA