Ji bo ciwanan projeyeke taybet

KADAR IBRAHÎM / QAMIŞLO

Bi însiyatîfa Komîteya Ciwan û Werzîşê û bi hevkariya Navenda Pêşxistina Ciwanan a herêma Cizîrê projeya perwerdeya pîşeyî di sala 2017`an de hate vekirin. Ev proje ji bo xurtkirin û pêşxistina karînên ciwanên navçeyê da ku di civakê de aktîf bin, hate vekirin.

Di projeyê de li ser gelek pîşeyan wekî hesinkarî, kompîtur, dirûtin û hwd. perwerde tê dayîn. Her perwerdekarek 3 mehan li navenda pêşxistina ciwanan a navçeya Amûdê perwerdeya xwe dibîne. Meha destpêkê teorî ye û du mehên din jî pratîk in.

Desteya Ciwan û Werzîşê ya herêma Cizîrê çavdêriya vê projeyê dike. Her wiha werşeyên kar ên taybet û bi hevkariya hin pîşekaran organîze dike û piştî bidawîbûna dewreyan hînber derbasî qada pratîkê dibin.

Diyarkirina karînên hînberan

Piştî bidawîbûna dewreyên pîşekar, karînên hînberan her yek di pîşeya xwe de diyar dike û navên wan dide Desteya Ciwan û Werzîşê. Her wiha bi hevkariya navenda pêşxistina ciwanan alavên kar amade dike û radestî hînberan dike da ku yekser dest bi kar bikin. Eger hînber negihaşt asta ku tê xwestin, dewreyê ji nû ve dubare dike.

Ji destpêka vekirina Navenda Pêşxistina Ciwanan a Amûde ve di 1'ê Mijdara 2017'an de û heta niha 3 dewre vekirine. Dewreya 4'emîn di hefteya borî de bi tevlêbûna 25 ciwan her du zayendan ve dest pê kir. Divê temenê hînber di nav bera 18-25 saliyê de be.

Armanca projeyê pêşxistina pîşeyan di navbera ciwanan de ye

Komîteya Ciwan û Werzîşê ya Meclisa Navçeya Amûdê bi rêya vê projeyê hewl dide bêkariyê li herêmê kêm bike û karînên ciwanan xurt bike û pêş bixe da ku bibin kesên berpirsyar û herêmên xwe bi pêş bixin.

Endama rêveber a Komîteya Ciwan û Werzîşê ya Meclisa navçeya Amûdê Jiyan Esad destnîşan kir ku ji bo tevlêbûna dewreyê bi dehan ciwanan navên xwe tomar kirine.

Ji aliyê xwe ve hevserokê Navenda Pêşxistina Ciwanan a navçeya Amûdê Kawa Ibrahîm diyar kir ku heta niha 3 dewre bi dawî kirine û destnîşan kir ku 5 navendên pîşeyan wekî dirûtin, hesinkarî, dirêjkirina xetên kanalîzasyonê, elektronîk û kompîtur li navendê hene.

(şx)

ANHA