Şêniyên Dêrikê azarên pirsgirêka nan dikişînin

ÎSAM ABDULLAH - AMARA CÛDÎ / QAMIŞLO

Şêniyên herêma Dêrikê ji beriya çend mehan ve ji ber nebaşiya cureya nanê firina bajêr bi gilî û gazinc in. Firin nanê şewitî ya nanê wekî hevîr derdixe.

Berpirsên firinê sedema vê pirsgirêkê vedigerînin nebaşiya cureya ard û kêmbûna karkeran.

Gelek karkeran ji ber mûçeya kêm kar berda

Li gorî rêveberiyên firinê kêmbûna hejmara karkeran bandoreke neyînî li kalîteya nan dike. Di firinê de karker rojane 8 saetan dixebite û 22 hezar lîreyên Sûriyeyê weke mûçe digire. Lê ev mûçe kêm e ji ber wê karker kar berdidin.

Kêmbûna wekîlan pirsgirêkê di belavkirinê de derdixe

Ji ber nebaşiya kalîteya nan, şênî neçar dimînin nanê siyahî bikirin û ew jî dibe sedema zêdebûna miqdara nan li gel wekîlan. Ji ber wê wekîl miqdara nan ji 2 hezar turbe nan kêm kirin 500 turbe nan.

Kêmbûna miqdara nan li gel wekîlan bû sedema ku şênî li ber firinê kom bibin û bi taybet şêniyên gundan.

Li gorî endamê rêveber Ekrem Abdulkerîm diyar kir ku tevî van pirsgirêkan, hin endamên saziyan beyî ku qanûnên tabûra nan pêk bînin û bi rêya belgeyekê ji saziya têkildar ve, nan ji firinê digirin. 

Me daxwaz û giliyên xwe gihandin meclisa navçeyê

Endamê rêveber Ekrem Abdulkerîm got: "Ji bo çareserkirina vê pirsgirêkê em gelek caran bi maclisa navçeya Dêrikê re civiyan, lê meclis heta niha daxwaza me bi cih neanî."

Her wiha Ekrem Abdulkerîm bang li aliyên Têkildar û bi taybet Komîteya Aş û Desteya Aborî kir girtekên pêwîst ji bo başkirina cureya ard bigirin û pêdiviyên firinan bi cih bînin.

(şx)

ANHA