Şaredariya Reqayê beriya cejnê karê xwe zêde dike

REQA

Şaredariya Gel ji bo tevgera şêniyên bajarê Reqayê hêsan bibe û aliyê xizmetguzariyê baş bike, rêyên bajêr asfalt dike.

Werşeyên kar rêya giştî ya di navbera taxa Rimêla û navenda bajêr de, kolanên Til Ebyd, Cisir El-Sewame, kolana 23 Şibatê ji aliyê dîwarê El-Reşîd ve asfalt dikin. Her wiha vekirina rêyên ku bajarê Reqayê û gundewarên wê bi hev ve dide girêdan, didomîne.

Alavên paqijiyê yên girêdayî şaredariyê rêyên taxa El-Sewre, El-Nehde û Mesakin El-Iskan ji bermahiyên şer paqij dike.

Ji aliyekî din ve jî Rêxistina Destwerdanên Destpêkê bi hevkariya Meclisa Sivîl a Reqayê ji nû ve bexçeyê El-Nexîl ê li kolana El-Wadî sererast dike. Her wiha rêxistin bermahiyên şer ji baxçeyê El-Nexîl ê kolana El-Wadî radike û hemû kolanê dê beriya cejna Qurbanê paqij bike da ku tevgera şêniyan hêsan bibe.

Di vê çarçoveyê de hevserokê Şaredariya Gel a Reqayê Ehmed El-Îbrahîm got ew ê hemû rêyên sereke û şaxî yên bajar Reqayê dê vekin, her wiha dê rêyan asfalt bikin. El-Îbrahîm destnîşan kir ku ew ê rêya di navbera gundewarên rojhilatê bajarê Reqayê û bajêr ji aliyê deriyê Bexda heta çerxerêya El-Berazî û çerxerêya El-Dele ya navenda bajêr asfalt bikin.

Ji destpêka ku bajarê Reqayê ji aliyê şervanên QSD`ê ve di 20`ê Cotmeha 2017`an de ji çeteyên DAIŞ`ê hate rizgarkirin, Meclisa Sivîl a Reqayê bi hemû hêza xwe hewl dide şaristaniya bajêr lê vegerîne.

(bx)

ANHA