Aloziya hilbijartinan didome, 4 partiyên Başûr encam red kirin

NAVENDA NÛÇEYAN

Piştî ku encamên teqez ên hilbijartina Iraqê û Başûrê Kurdistanê ya 12’ê Gulanê hatin ragihandin Tevgera Goran, Îslamî Yekgirtû, Komala Îslamî û Tevgera Demokraîsî û Dadê li Navenda Tevgera Goran hatin cem hev û encamên hilbijartinê nirxandin.

Piştî nirxandinê Sekreterê Tevgera Goran Omer Seyîd Elî, Sekreterê Îslama Yekgirtû Selahaddîn Bahaddîn û Lîderê Komala Îslamî Elî Babîr, lîderê Koalîsyona Demokasî û Dadê Berham Salih daxuyaniyeke hevpar dan. Di daxuyaniya hevpar de hate gotin ew encamên teqez red dikin.

Di daxuyaniyê de wiha hate gotin: "Ji bo ku dek û dolaba mezin binixumînin xuyaye hin sendoq bi dest hatine hijmartin."

Di daxuyaniye de hate gotin, "Li Iraqê û Başûr kêm sendoq dîsa hatin vekirin û hijmartin" û bi berdewamî hate gotin, "Em encaman red dikin û helwesta xwe ya berê didomînin. Ji bo ku pêbawerî bi pêvajoya siyasî were û dengên hilbijêran biparêzin em ê serî li rêyên yasayî bidin."

Partiyan beriya niha gotibûn heke li ser babeta hîle û dek û dolaban fikarên wan bersivê nebinin ew ê tevlî pêvajoya siyasî ya Iraqê nebin. Tevlênebûna li pêvajoya siyasî tê maneya temsîlnebûna beşekî û her wiha bi kêm parlamenteran vebûna Parlamentoya Iraqê.