Cotkarên Reqayê xisarên xwe qerebû kirin

EHMED El-ESAF / REQA

Mewsîma genim ku mezintirîn mewsîmên çandiniyê li Reqayê tê hesbandin û ya ku şêniyên Reqayê debara xwe pê dikin, ji ber barîna barana ya zêde di gulana borî de lehî rabûn di encamê de mewsîma genim kufik bû û berhem kêm bû.

Ji bo qerebûkirina xisarê, cotkarên bajêr û gundewarên Reqayê berhemên havînê diçînin mîna zebeş, sebze, garis û pembo.

Li gorî cotkaran berhema her dinomek ji garisê 600 kg e, berhema zebeş 5 ton e û ya sebzeyan dighêje toneyek. Her wiha rûbara qada ku li rojhilatê gundewarên Reqayê hatî çandin nêzî 55 hezar dinom e.

Ji ber berhemên sebzeyên havînê, sûkên herêmî geş bûne û buhaya sebzeya bi awayekî berbiçav kêm bûye. Nirxê kîloya petatan (kartol) 150 lîreyên Sûriyeyê ye û nirxa kîloya bacanê sor 40 lîre bû lê di van du rojên dawî de buha bû û di nav bera 100-150 lîreyên Sûriyeyê tê firotin. Her wiha nirxa kîloya zebeş 25 lîreyên Sûriyeyê ye.

Cotkarê bi navê Ehmed Remedan wiha got: "Mewsîma genim telef bû, me gelek xisarên mezin dîtin û ji bo qerebûkirina van xisaran me hilberînên havînê çandin û em wan bi rêya ava bîran av didin ji ber ku hilmija avdanê ya herêmê xirab e."

Ji aliyê xwe ve cotkarê bi navê Ehmed El-Hisên ev tişt anîn ziman: "Ji ber kêm lêçûna çandina mewsîma havînê û ji ber ku di demek kin de tê ber hev kirin, me dest bi çandina wê kir. Berhemên havînê û bi taybet sebze û zebeş têra herêmê dike û bi nirxek li gorî welatiyan e."

Her du cotkaran bang li Meclisa Sivîl a Reqayê kir ku destek bidin çandiniyê û diravxaneyên çandiniyê vekin û her wiha semad, derman û tovên dureg ji cotkaran re pêşkêş bikin.

Berpirsyarê komîteyên çandiniyê yê rojhilatê gundewarên Reqayê Ebdullah El-Şihazê got ku ji ber xirabûna hilmijên herêmê wan av ji hinek deveran re pêşkêş kiriye.

Piştî rizgarkirina şervanên QSD'ê bajarê Reqayê û gundewarên wê ji çeteyên DAIŞ'ê di 20'ê cotmeha sala borî de, çandinî û aboriya herêmê geş bûye. Bi sedan cotkar vegerîn karên xwe yên berê û dest bi çandina zeviyên xwe kir.

(şx/ew)

ANHA