Jinên Qamişlo: Li gel Ocalan kilîta çareseriya hemû aloziyan heye

SILAVA EBDULLREHMAN / QAMIŞLO

Dewleta tirk tecrîdeke giran li ser Rêberê Gelê Kurd Abdullah Ocalan ferz kiriye û bi hincetên cude serdanên parêzer û malbata Ocalan red dike.

Girêdayî vê mijarê hejmareke jinên Qamişlo nêrînên xwe bi rêya ajansa me anîn ziman û tecrîd şermezar kir û tekez kir ku dagirkeriya tirk bi kiryarên xwe, wan ji daxwaza azadiya Ocalan bi şûn ve naxe.

Têkildarî mijarê dayika bi navê Etiye wiha got: "Dewleta tirk ji sala 2011'an ve tecrîd li ser Abdullah Ocalan ferz kiriye û hemû qanûn û peymanên navdewletî paşguh kirine û destûr nade ku parêzerên wî hevdîtinan bi miwekilê xwe re bikin." Her wiha dayika Etiye diyar kir ku berdewama tecrîda li ser Rêberê Gelê Kurd Abdullah Ocalan, berdewama alozî û şerên Rojhilata Navîn e. Ji ber ku li gel Ocalan kilîta çarseriya aloziyên Rojhilata Navîn heye û fikra wî ya azadî û wekheviya gelan armanc digire.Di dawiya axaftina xwe de dayika Etiye pê de çû: "Heta rizgarkirina Ocalan em dest ji çalakiyên xwe bernadin".

Ji aliyê xwe ve dayika ji pêkhateya ereb Lemîs El-Hebîb got ku Oclan rêberê yekemîn e ku ji bo azadiya jinan tê koşiyaye û ciyawaziya ku pergalên zordar di nav gelan de çandibûn rakir. Dayika Lemîs wiha pê de çû: "Piştî Şoreşa Rojava bi saya fikr û felsefeya Ocalan, jinan karî maf û azadiya xwe bi awayekî berbiçav bistînin."

Di dawiya axaftina xwe de Lemîs bêdengiya rêxistinên mafên mirovan li hemberî binpêkirinên dagirkeriya tirk di ferzkirina tecrîda li ser Ocalan û binpêkirinên wê li Efrînê de, rexne kirin.

(şx)

ANHA