Di çarçoveya ne şer û ne aştiyê de Xeza

XEZA  / UMER MÛSA

Îsraîlê îdia dike ku êrîşên wê bersiva berdewama meşên li nêzî xeta sînor a di navbera herêma Filistînê û deverên Filistînê yên dagirkirî de ye û dibêje ku tevgera Hemas ji vê tundiyê berpirsyar e.

Hêjayî gotinê ye ku meşên aştiyane yên vegerê ku beriya nêzî du mehan dest pê kirine û banga rakirina ambargoya li ser herêma Xezayê dikin, rastî tundî û kuştinê ji aliyê artêşa Îsraîlê ve hatin. Li gorî Wezareta Tenduristiyê ya Filistînê li Xezayê artêşa Îsraîlê bêtirî 155 filistînî kuştin û bêtirî hezar û 100 filistîniyên din jî birîndar bûn.

Tabûrên Filistînê serê xwe ji Îsraîlê re natewînin û di bersivdayîna êrîşan de bi israr in û fûzeyan bi ser niştecihgehên nêzî herêmê de diavêjin û bi hevkêşiya "topbarana li hemberî topbaranê" bi nav dikin.

Li hemberî girêdana tabûrên Filistînê bi vê hevkêşiyê re hikumeta Îsraîlê bi daxuyaniyan hêrsa xwe nîşan dide û alîgirên rastgir ên Îsraîlê jî hewl didin şerekî nû li dijî Xezayê bidin destpêkirin. Çavdêrên Îsraîlê diyar dikin ku qebûlkirina hevkêşeyeke ku Xeza  pêşkêş dike lawaziyek e û divê artêş bersiva wê bi hemleyeke leşkerî bide, eger tabûrên Filistînê topbarana xwe li dijî Îsraîlê berdewam kir.

Herêma Xeza li ser girekî agir dijî û di çarçoveya vê rewşa şer û aştiyê de, qad roj bi roj gurtir dibe û topbaran rojane dubare dibin. Her wiha rewşa mirovî li herêmê jî xirabtir dibe û ji ber vê mijarê helwesta giştî li herêmê şer e da ku henaseyekê ji Xezayê re wergirin û li hemberî wê hikumeta Îsraîlê serhişkiya xwe didomîne û ambargoya li ser herêmê ev 12 sal e hişktir dike.

Rayedarên navneteweyî hişyariya berdewama ambargoya li ser Xezayê da û banga bidawîkirina rewşa şer kir ku Îsraîl li dijî Xezayê bi rê ve dibe.

Şandeyê Neteweyên Yekbûyî yê Rojhilata Navîn Nîkolay Mladînov girêdayî mijarê wiha got: "Mijar diyar dike ku em li ber şerekî nû li dijî Xezayê ne û divê hemû rewşa mirovî ya têkçûyî li Xezayê di ber çavan re derbas bike û îhtîmala şer dûr bixe."

Êrîşên leşkerî yên dubare, ber bi xeta şer ve diçe û her du aliyan di destpêkê de diyar kir ku ew hewl didin şer dûr bixin. Îsraîlê di van êrîşên xwe de 2 zarok kuştin û 10 kesên din jî birîndar kirin. Her wiha 8 endamên tabûrên El-Qesam kuştin û 15 endamên din jî birîndar bûn.

Li rex vê çarçoveyê dubare nûçe derdikevin ku planek tê amadekirin da ku hevpeymanekê di navbera Îsraîl û Xezayê de pêk bînin û agirbestê li ser erdê pêk bîne û rewşa mirovî li Xezayê baştir bikin. Lê ev nûçe tenê gotegot in û tu gavên rasteqîn girêdayî wê pêk nehatine.

Çavdêran ji ajansa me ANHA'yê re encam wiha guman kirin: "Dijberiya leşkerî zêde dibe, ev tê wateya ku rewş dê di bîstikekê de biteqe. Rast e ku kedên navneteweyî ji bo aramiyê tên meşandin, lê çirûska şer beriya demekê vêketiye. Di van rewşên mirovî yên dijwar û paşguhkirî de ku welatiyên Xezayê  tê re derbas dibin, tê wateya ku di van rojên pêş de rewş dê girantir bibe, nemaze ji ber ku êdî Xeza nikare tehemûl bike û Îsraîl jî vê yekê baş dizane.

ANHA