Gelê Kobanê xwe ji pêşwaziya salvegera 19'ê Tîrmehê re amade dike

Rêveberiya kantona Kobanê tevî şêniyan di çarçoveya çalakiyên salvegera 6`emîn a Şoreşa 19`ê Tîrmehê de ku ji Kobanê dest pê kir, ji saetên sibê ve dest bi paqijkirina kolanên bajar kir.

NÛÇE

16 tîrmeh, 2018 11:58

KOBANÊ

Xebatên pêşwazîkirina salvegera Şoreşa 19'ê Tîrmehê li kantona Kobanê bê navber dewam dikin. Di vê çarçoveyê de hevserokên Meclisa Rêveber a Kobanê Enwer Muslim û Bêrîvan Hesen, hevserokê Meclisa Kantona Kobanê Mustefa Îto, hevserokê Meclisa TEV-DEM`ê Ehmed Şêxo, hevserokên desteyên Rêveberiya Xweser a Kobanê, bi dehan şêniyên Kobanê û bi hevkariya endamên Şaredariya Gel a Kobanê, ji saetê sibê ve dest bi paqijkirina kolanên Kobanê kir.

Xebatên paqijiyê ji Qada Jina Azad hatin destpêkirin. Her ekîbekî berê xwe da aliyekî û dest bi paqijiyê kir.

Hevserokê Meclisa Kantona Kobanê Mistefa Îto di hemleya paqijiyê de ji ajansa me re axivî û Şoreşa 19`ê Tîrmehê li hemû mirovahiyê pîroz kir û wiha got: "Me îro wek rêveberiya Kobanê û gelê xwe di çarçoveya çalakiyên mîhrîcana 19`ê Tîrmehê de di bin slogana “Bajarê me mala me ye” de dest bi paqijkirina bajarê xwe kir."

Xebatên paqijiyê dê li tevahiya tax û kolanên Kobanê belav bibe. Heta niha di çarçoveya mîhrîcana 19`ê Tîrmehê de ku 14`ê mehê dest pê kir, meş, şahî û semîner hatin lidarsxistin.

(ekîb)

ANHA