'19'ê Tîrmehê asoyeke nû li pêş gelê me vekir'

KOBANÊ

Partiya Demokratîk a Kurd li Sûriyê (P.D.K.S) bi nêzîkbûna salvegera Şoreşa 19'ê Tîrmehê, li bajaroka Pêndir a dikeve rojavayê bajarê Kobanê semînereke organîze kir.

Semîner li dibistanekê bi amadebûna bi dehan kesî hate dayîn.

Li cihê semîner lê hate dayîn wêneyên Rêberê Gelê Kurdî Abdullah Ocalan û pankartên bi nivîsênê "Şoreşa 19'ê Tîrmehê asoyeke nû li pêş gelê me vekir" hatin daliqandin.

Semîner ji aliyê endamên Komîteya Navendî ya partiyê Nîhad Ehmed û Mustefa Ebdî ve hate dayîn.

Piştî deqeyeke rêzgirtinê li ser giyanên cangoriyên azadiyê, endamê Komîteya Navenedî ya Partiya Demokratîk a Kurd li Sûriyê Mustefa Ebdî girîngiya roja 19'ê Tîrmehê şîrove kir û got,"Çend roj pêş em salavgera Şoreşa 19'ê Tîrmehê ya 2012'ê pêşwazî dikin û pîroz dikin. Di wê rojê de çirûska şoreşê ji Kobanê de dest pê kir û li Rojava belav bû bû îlankirina Rêveberiya Xweser bi encam bû."

Ebdî got, " Şoreşa 19'ê Tîrmehê bû tîrêj û şewqa xwe da jiyanê."

Nîhad Ehmed jî ji aliyê xwe ve anî ziman ku bi şoreşa 19'ê Tîrmehê de gelek gav hatin avêtin û wiha domand," Ew şoreşa ji bo me bû weke lingekî ku em li ser disekinin, 19' ê Tîrmehê bû bingeha rêxistinbûyînê û avakirina civakeke demokratîk."

Di dawiya semînerê de besiva pirsên beşdaran hatin dayîn.

Hêjayî gotinê ye ku li navçeya Çelepiyê jî bi heman armancê û heman semîner hate dayîn.

(şm-sn)

ANHA