Cenazeyê şehîd Kendal Efrîn li Şehbayê hate oxirkirin

ŞEHBA

Şêniyên Efrîn û Şehbayê cenazeyê şervanê YPG'ê Kendal Efrîn (Reşîd Simo) ku li herêma Eyn Îsa dema ku bi erka xwe ya leşkerî radibû şehîd bû, ber bi goristana şehîdan a gundê Ehrezê yê kantona Şehbayê ve bir û bi merasîmekê oxir kir.

Merasîm bi deqeyeke rêzgirtinê dest pê kir, paşê gelek axaftin hatin kirin. Hevserokê Meclisa Malbatên Şehîdan Merwan Efrîn axivî û sersaxî ji malbata şehîd re xwest û hemû şehîdên şoreşa rojavayê Kurdistanê bi bîr anîn.

Merwan Efrîn wiha axivî: "Ji destpêka tevgera me ya azadiyê ve em şehîdan didin. Şehîd bingeha serkeftina me ne. Em ê rêya wan heta pêkanîna azadî û serfiraziyê bişopînin."

Di merasîmê de her wiha endama Rêveberiya Kongreya Star Rojhilat Arif axivî û diyar kir ku şehîdan her tiştê xwe yê giranbuha di ber welatê xwe de dane û ji bo biratiya gelan canê xwe feda kiriye.

Rojhilat Arif di berdewama axaftina xwe de got ku komploya dewletên herêmî û navneteweyî li dijî gelê Efrînê hê jî berdewam dike û li hemberî wê welatiyên Efrînê asta berxwedana xwe li dijî van komployan bilindtir dike.

Di dawiya merasîmê de cenazeyê şehîd Kendal bi tilîliyên dayikan û dirûşmên dilsoziya bi şehîdan re spartin axê.

(cu-jh/ew)

ANHA