Gelê herêma Firatê cenazeyê Xalid Kûtê spartin axê

Şêniyên Kantona Girê Spî cenazeyê Endamê Meclîsa Giştî ya PYD′ê Xalid Kûtê li goristana Şehîd Mehmûd Tumê oxir kirin.

NÛÇE

2 gulan, 2018 14:30

GIRÊ SPÎ

Bi sedan şêniyên herêma Firatê, Hevseroka PYD′ê Eyşe Hiso û Rêveberên partiyê yên Bakurê Sûriyeyê, her wiha nûnerên Meclîsa Malbatên Şehîdan, şervanên YPG/YPJ′ê beşdarî merasîma oxirkirinê bûn.

Girseya gel cenazeyê şehîd ji nexweşxaneya leşkerî ya bajarê Girê Spî wergirtin û ber bi goristanê ve ketin rê. Li goristanê merasîm bi toraneke leşkerî dest pê kir. Piştre Eyşe Hiso, Endamê Rêveberiya Meclîsa Malbatên Şehîdan Arif Balî, Fermandarê YPG′ê Elî Şêr Kobanê û Hevserokê Rêveberiya Xweser a Kantona Girê Spî Hemdan El-Ebid axivîn.

Axêveran sersaxî ji malbata şehîd re xwestin û bal kişandin ser têkoşîna şehîd di şoreşa Rojava de. Her wiha soza şopandina riya cangoriyên azadiyê hat dayîn.

Di dawiyê de nasnameya şehîd hat xwendin, radestî malbata wî hat kirin û cenazeyê wî li goristanê hat veşartin.

Şehîd Xalid Kûtê li Girê Spî di encama teqîna mayînekê de, şehîd bû.

(mm)

ANHA