Li Girkê Legê tecrîda li ser Ocalan hate şermezarkirin

QAMIŞLO

Bi sedan şêniyên navçeyên Girê Legê, Çilaxa û Til Koçer û gundewarên wê bi armanca şermezarkirina tecrîda li ser Rêberê Gelê Kurd Abdullah Ocalan û êrîşên artêşa Tirk a dagirker û çeteyên wê li ser herêma Efrînê tevlî xwepêşanda ku li bajarê Girkê Legê hate lidarxistin, bûn.

Xwepêşandan ji qada Şehîd Xebat a bajarê Girkê Legê destpê kir. Di xwepêşandanê de wêneyên Rêberê Gelê Kurd Abdullah Ocalan û pankartên bi nivîsên "Bi rihê Berxwedana Efrînê em ê bi Rêberê xwe re azad bijîn, tecrîda li ser Rêber Ocalan lewazkirina pêvajoya aştiyê ye û azadiya Rêber Ocalan azadiya hemû gelan e" hatin hildan.

Xwepêşandan li hemû kolanên bajar geriya. Di xwepêşandanê de dirûşmeyên şermezarkirina êrîşên artêşa Tirk a dagirker li ser herêma Efrînê û  her wiha şermezarkirina tecrîda li ser Rêberê Gelê Kurd Abdullah Ocalan hatin birêzkirin.

Xwepêşandan li navenda bajar veguherî mitîngê. Mitîng bi rêzgritin destpê kir. Paşê bi navê Rêveberiya Sivîl a Demokrtîk Hevserokê Desteya Karûbarên Hundir ê kantona Cizîrê Kenan Berekat axivî.

Berekat di axaftina xwe de tecrîda li ser Rêberê Gelê Kurd Abdullah Ocalan şermezar kir.

Berekat li ser berxwedana gelê Bakurê Sûriyê axivî û tekez kir ku Berxwedana Serdemê didome û ev tişt bilêv kir,"Berxwedana ne tenê ji bo Bakurê Sûriyeyê. Em ji bo tevahî Kuristanê, Rojhilata Navîn û gelê binddest li ber xwe didin. Em ê heta dawiyê ji bo pêkanîna projeya azadî û demokratîk li ber xwe bidin."

Kenan di berdewamiya axaftina xwe de destnîşan kir ku armanca girankirina tecrîda li ser Ocalan û êrîşên li ser Rojava – Bakurê Sûriyê têkbirina projeya Federaliya Demokratîk a Bakurê Sûriyê yê. Ji ber ku Ocalan xwediyê projeya federalî û demokrasiyê ye.

Di dawiyê de Kenan diyar kir ku berxwedana Efrînê li hember artêşa Tirk a dagirker û çeteyên wê di qonaxa xwe ya duyemîn de didome û gelê Efrînê û hêzên berxwedêr wê hesab ji hemû kesên ku alîkariya Erdoganê faşîst dikin, bixwazin.

Mitîng bi dirûşmeyên bijî Berxwedana Serdemê û bijî Rêberê Gelê Kurd Abdullah Ocalan bidawî bû.

(bx)

ANHA