Li kampa Bexwedan du zarokan jiyana xwe ji dest dan

Ji ber rewşa dijwar a ku gelê Kantona Efrînê li Kantona Şehbayê dijî û paşguhkirina rêxistinên mirovî, du zarokên bi şîr jiyana xwe ji dest dan.

13 nîsan, 2018 06:55

ELÎ GEDRO – BASIL REŞÎD / ŞEHBA

Zarokên bi şîr ên bi navên Hemrîn Yûsif a 16 rojî 10ʹê Nîsanê û Emîne Nûr a 5 rojî jî 5 Nîsanê jiyana xwe ji dest dan. Herdû zarok ji gundê Meydan Ekbes a ji Kantona Efrînê ye.

Herdû zarok bi nexweşiyên giran ketibûn, lê ji ber tunebûna alavên tenduristiyê Heyva Sor a Kurd nikarîbû wan derman bike. Rêxistinên mirovî jî rewşa zarokan ji nedîtî ve tê.

Endama Rêveberiya Heyva Sor a Kurd Rîm Qermo diyar kir ku ekîba Heyva Sor a Kurd bi hemû derfetên xwe hewl da zarokan derman bike l ji ber tunebûna dermanan û alavên tenduristiyê nikarîbûn jiyana zarokan xelas bikin.

Rîm bang li rêxistinên navneteweyî û mirovî kir ku ji bêdengiya xwe derkeve û rewşa zarokên Kantona Efrînê yên li ser Kantona Şehbayê dimînin, di ber çav re derbas bikin. Her wiha dermanan û alavên tenduristiyê pêşkêşî Heyva Sor a Kurd bikin.

Rîm diyar kir ku bi sedan zarokên Efrînê nexwşin û alîkariya wan a lezgîn bi demankirinê heye.

Bi hezaran gelê Kantona Efrînê ji ber êrîşên dagirkeriyê Tirk berê xwe dan Kantona Şehbayê. Ji ber vê Rêveberiya Xweser a Kantona Efrînê bi hevkariya Kantona Şehbayê kampa Berxwedan vekir. Lê kampê navendên tenduristiyê nîn in. Tenê Heyva Sor a Kurd li gorî derfetên kêm, xizmetên tenduristiyê pêşkêşî gel dike.

(mm)

ANHA