Gelê Qamişlo şehîdên meha Adarê bi bîr anîn

Meclîsa Malbatên Şehîdan a bajarê Qamişlo merasîma bîranîna 71 şehîdên meha Adarê ku di şoreşa Rojava û Tevgera Azadiya Kurdistanê de şehîd bûne, li dar xist.

31 adar, 2018 18:45

QAMIŞLO – Merasîma bîranînê li goristana Şehîd Delîl Sarûxan bi beşdariya bi dehan malbatên şehîdan û nûnerên Rêveberiya Xweser, hat lidarxistin.

Girseya gel şehîd Masûm Korkmaz (Egîd) û şehîdên Serhildana Qamişlo ya 2004ʹan, her wiha şehîdên şaredariya Qamişlo, şehîdên YPG/YPJ/HPG/TEV-DEMʹê û Hêzên Asayîşê ku di meha Adarê de şehîd bûne, bi bîr anîn.

Merasîma bîranînê bi deqeyek rêz dest pê kir. Piştre Seroka Desteya Darayî ya Kantona Cizîrê Remziya Mihemed axivî, sersaxî ji malbatên şehîdan û tevahî gelê Bakurê Sûriyê re xwest û wiha got, ʺDi kesayeta şehîdêm meha Adarê de, em tevahî şehîdên Azadiyê bi bîr tînin û bejna xwe li hember wan ditewînin. Meha Adarê bi meha têkoşîn û azadiyê tê nasîn.ʺ

Remziye her wiha da zanîn ku şehîd Egîd sembola berxwedan û têkoşîna leşkerî ya li dijî faşîzma Tirk e. Remziye soza şopandina riya şehîdên azadiyê da.

Merasîma bîranînê bi xwendina nasnameyên şehîdan bi dawî bû.

(mm)

ANHA