Gelê Qamişlo xwedî li Berxwedana Serdemê derket

QAMIŞLO – Girseya gel li çerxerêya Sewami ya taxa Qenat Siwês a bajarê Qamişlo kom bûn û pankartên  ʺEm êrîşên dagirkeriya Tirk li ser Efrînê şermezar dikinʺ, ʺBijî berxwedana Efrînêʺ û alên YPG/YPJʹê, wêneyên şehîdên Efrînê û Rêberê gelê Kurd Abdullah Ocalan hildan.  

Meş ber bi çerxerêya şehîdên navneteweyî ve herikî. Li çerxerêyê meşvanan deqeyek rêz girtin. Piştre Endama Kongreya Star Şeha Xelîl axivî  û da  zanîn ku ew îro derketine qadan da ji tevahî cîhanê re îsbat bikin ku ew axa welatê xwe terk nakin û wiha got, ʺEm asta têkoşîna xwe bilind bikin û welatê xwe ji dagirkeran rizgar bikin.ʺ

Meş bi dirûşmeyên ʺBijî berxwedana Efrînêʺ bi dawî bû. 

AMÛDÊ

Bi sedan şêniyên navçeya Amûdê jî meşek li dar xistin û xwedî li berxwedana Efrînê derketin. 

Meş ji aliyê TEV-DEMʹê ve hat organîzekirin û ji Qada Şehîd Cîhad ber bi Qada Jina Azad ve herikî. Meşvanan dirûşmeyên ʺBijî berxwedana Efrînêʺ berz kirin û dagirkeriya Tirk şermezar kirin.

 Li Qada Jina Azad, deqeyek rêz hat girtin. Piştre Hevserokê Meclîsa Rêveber a Kantona Cizîrê Ebdulkerîm Sarûxan axivî û bang li tevahî gelên Bakurê Sûriyê kir ku li dijî dagirkeriya Tirk serî hildin û xwedî li berxwedana Efrînê derkevin. 

Sarûxan anî ziman ku ev roja (Roja Efrîn a Cîhanê) roja serketina Efrînê li hember dagirkeriyê ye û wiha domand, ʺBila tevahî gelên cîhanê bizanibin ku serketin a hêzên me ye.ʺ 

Bi navê Kongreya Star a navçeyê Şehnaz Esed jî axivî, destnîşan kir ku Berxwedana Serdemê di roja 64ʹan de didome û wiha got, ʺEm di pêvajoya nû ya Berxwedana Serdemê de jî dagirkeriya Tirk re dibêjin ku em destûr nadin ku hun desthilatdariya xwe li ser gelê me ferz bikin. Em ê berxwedana xwe bidomînin heta Efrîn ji dagirkeran rizgar dibe.ʺ 

Meş bi dirûşmeyên ʺBijî Berxwedana Serdemêʺ û ʺŞehîd namirinʺ bi dawî bû. 

(mm)

ANHA