Li Siwêdê panela ji bo Efrînê ji aliyê Salih Muslim ve hat rêvebirin

NAVENDA NÛÇEYAN – Panel ji aliyê Endamê Komîteya Têkiliyên Giştî ya TEV-DEMꞌê Salih Muslim, Parlemanterê Partiya Sosyal a Demokratîk û berpirsyarê têkiliyên derve yên Partiyê Anders Osterbury, her wiha perlemanterê Partiya Kesk Walter Mott, panel bi rêve bir.

Panel bi beşdariya parlemanterên Partiya Çep û Partiya Rast a Siwêdî û nûnerên Civaka Sivîl û Şopdarên karûbarên Kurdî hat lidarxistin.

Di panelê de Salih Muslim li ser êrîşên Dewleta Tirk a dagirker ên li ser Efrînê û Berxwedana Serdemê axivî. Salih da zanîn ku tevî bêdengiya navneteweyî hêzên YPG/YPJꞌê li hemberî hêza duyemîn a NATOꞌyê û hezarên komên çete, bêhtirî du mehan berxwedaneke bêhempa dane meşandin. Salih di axaftina xwe de bal kişand ser berpirsyariya civaka navneteweyî ya ku li dijî gelê Kurd, Dewleta Tirk a dagirker bi çekên herî giran dikir.

Her wiha Salih Muslim di axaftina xwe de derbarê komkujiyên faşîzma Tirk û çeteyên wê yên li ser sivîlên Efrînê de axivî û wiha domand, ʺDewleta Tirk bi van kiryaran ne tenê li ser gelê Kurd, lê belê metirsiyê li ser hemû gelên aştîxwaz ên herêma Rojhilata Navîn û giştî cîhanê çêdike.ʺ

Beşdaran pirsa bêdengiya wezîra karê derve ya Siwêdê derbarê êrîşên dagirkeriya Tirk de, çawaniya alîkariya gelê Efrînê piştî ku xaka wan hate dagirkirin û malên wan hatin rûxandin de ji parlemanterên Siwêdî kir. Her  wiha beşdarekî diyar kir ku her dem bahaneya bêdengiya Ewropayê ew e ku Kurd terorîst in. Sedema vê bahaneyê jî derbaskirina partiya PKKꞌê nava "Lîsteya Terorê" ye û da zanîn ku çareseriya vê yekê ew e ku partiya PKKꞌê ji vê lîsteyê were derxistin. 

Di panelê de parlemanterê Partiya Kesk Walter Mott bi rengekî fermî êrîşên Dewleta Tirk a dagirker ên li ser Efrînê şermezar kir û daxwaz ji Dewleta Tirk kir ku yekser xwe ji Efrînê bikişîne. Her wiha bixêrhatina Salih Muslim li Siwêdê kir. 

Piştre li heman cihî civînek bi çapemeniyî û ragihandina cîhanê  re hate lidarxistin.

(dr)