ˋRêveberiya Xweser ji bo birêvebirina Sûriyeyê modela serkeftî yeˊ

Piştî ketina rejîma Baas a Sûriyeyê di 8'ê Kanûna 2024'an qonaxeke nû li Sûriyeyê dest pê kir. Di vê qonaxê de desthilata Şamê hewl dide pêkhateyên Sûriyeyê paşguh bike û tenê nêrîna xwe li ser welat ferz bike û pêkhateyên din paşguh dike.

Li hemberî van guhertinan, xebatên peydakirina pergaleke nû ku gelê Sûriyeyê ber bi dewleteke demokratîk, nenavendî û pirreng ve bibe, didomin. Girêdayî wê, projeya Rêveberiya Xweser, ji bo jinûve avakirina Sûriyeya yekbûyî ya li ser bingehên demokrasî û wekheviyê, modela herî serkeftî ye.

Der barê mijarê de endamê Meclisa Giştî ya Partiya Sûriya Pêşerojê Ehmed El Sultan ê ji bajarê Şedadê yê kantona Cizîrê diyar kir ku gelê Sûriyeyê ji desthilata Şamê wiha hêvî dike ku ew biryarên xwe li gorî berjewendiyên hemû pêkhateyên Sûriyeyê bide û ji paşguhkirina pêkhateyan a ku niha tê kirin jî, bi dûr bikeve.

El Sultan destnîşan kir ku divê biryarên cidî û zelal der barê agirbesta li tevahî xaka Sûriyeyê de werin dayîn û aloziyên hundirîn û derve yên Sûriyeyê bi dawî bibin.

El Sultan ev li gotinên xwe zêde kir: "Divê êrişên li dijî Bendava Tişrînê û derdora wê werin sekinandin û li hember vê êrişên leşkerî yên li dijî herêmê divê desthilata Şamê helwesteke cidî nîşan bide."

JI BO SÛRIYEYA DEMOKRATÎK A PIRRENG Û NENAVENDÎ BANG TÊN KIRIN

Li aliyekî din jî Berpirsê Têkiliyan a Partiya Sûriyeya Pêşerojê ya Şedadê Drç Salih El Zoba destnîşan kir ku Partiya Sûriya Pêşerojê ji bo sazkirina destûreke nû ya avakirina Sûriyeya demokratîk, pirreng û nenavendî ku li gorî hêvî û armancên gelê Sûriyeyê be, amade ye.

El Zoba destnîşan kir ku projeya Rêveberiya Xweser li ser asta niştîmanî tecrûbeyeke serkeftî ye û xwe di aliyê rêvebirina karûbarên herêmê yên li ser bingehên demokrasî û wekheviyê de, îsbat kir.

Di dawiya axaftina xwe de El Zoba diyar kir ku projeya Rêveberiya Xweser li dijî parçekirin û dabeşkirinê ye û teqeziyê bi yekbûna erdnîgariya Sûriyeyê û hevbeşiya hemû pêkhateyên wê, dide.

(mh/fr)

ANHA