ˊHeta Efrîn û herêmên dagirkirî rizgar dibin em ê çalakiyên xwe bilind bikinˊ

Bi boneya salvegera 6ˊan a destpêkirina êrişên dewleta Tirk a dagirker û çeteyên wê li dijî Efrînê li gelek bajarên Herêma Bakur û Rojhilatê Sûriyeyê û Helebê çalakî hatin lidarxistin.  Her wiha xelkê Kobanê ji Qada Şehîd Egîd heta bi Qada Jina Azad ve meşek li dar xist. Li wir hevseroka Desteya Jîngehê ya Kantona Firatê Almas El Romî axivî û got: "Têkbirina çeteyên wê DAIŞˊê bi destê welatiyên Herêma Bakur û Rojhilatê Sûriyeyê li xweşiya dewleta Tirk a dagirker nehat, ji ber wê êrişî Efrînê kir û dagir kir. 

Almas wiha got: "Îro erdnîgariya Efrînê parçekirî ye, darên wê tên qutkirin û şewitandin. Dem hatiya em dengê xwe li hember dewleta Tirk a dagirker û çeteyên wê bilind bikin û ji xaka xwe derxin. Dema vegera xelkê Efrînê li warê xwe, mal û xaka xwe ye."

Meş bi diruşmaˊBerxwedan jiyan eˊ bi dawî bû.

REQA

Li aliyekî din jî koçberên Efrînê yên li kantona Reqayê, endamên saziyên sivîl, PYDˊê, Partiya Sûriya Pêşerojê û Meclisa Kombûna Jinan a Zenûbiya daxuyanî da. Endamê maliya giştî ya QSDˊê Ebdulhemîd El Berazî li pêş Çerxerêya Neîm ya Reqayê daxuyanî xwend.

Di daxuyaniyê de dagirkirina Efrînê ji hêla dewleta Tirk a dagirker ve hate şermezarkirin û hate gotin êdî jin di vê qonaxê de li dijî zihniyeta dîkatoriyê ber bi nirxên civakî û demokrasiyê ve bûne pêşeng.

Di daxuyaniyê de hate destnîşankirin ku îro piştî derbasbûna 6 salan ji dagirkirina Efrînê, hîna sûcên dermirovî li dijî mirov, kevir û daran dewam dikin. Dagirkirî nasnameya xelkê Efrînê têk dibe, xwezayê wêran dike, daran qut dike û dişewitîne. Êdî jin bûne hedefa zihniyeta baviksalariyê.

TEBQA

Der barê heman mijarê de bi sedan xelkê kantona Tebqa, nûnerên Rêveberiya Sivîl, Partiya Sûriya Pêşerojê, tevgerên jin, ciwan, rûspiyên eşîran, meclisên leşkerî beşdarî meşa ji pêş rêveberiya deriyan a li taxa Sêyemîn heta bi Çerxerêya Meyselon bûn.

Li wir hevseroka Meclisa Rêveber a Kantona Tebqayê Hind El Elî li ser navê Rêvebeirya Sivîl a Demokratîk axivî û got: "Em ê di oxira rizgarkirina Efrînê û derkirina dewleta Tirk a dagirker û çeteyên wê de têkoşînê dewam bikin."

Hind wiha domand: "Dewleta Tirk a dagirker di oxira têkbirina Kurdan de xwest Efrînê dagir bike û demografiya wê biguherîne. Lê hewldana wê, ji ber ku gel li dora hêzên Efrînê civîn, hatin têkbirin."

Meş bi diruşmaˊbijî berxwedana Efrînêˊ bi dawî bû.

MINBIC

Nivîsgeha Rêxistina Koçberên Şehba û Efrînê, xelkê Minbicê têkildarî mijarê li pêş avahiya Rêveberiya Sivîl a Mınbicê daxuyaniyek da. Endamê nivîsgehê Fatme El Ehmed daxuyanî xwend.

Di daxuyaniyê de hate gotin jinê li hember dewleta Tirk a dagirker berxwedaneke lehengane raber kir; ji wan şehîd Avêsta Xabûr, Barîn Kobanê û Karker. Jina Efrînê xaka xwe berneda û ji bo parastina zarokên xwe li qadên şer bûn mertal. Êdî dayikên Efrînê nimûneya parêzvaniyê ne.

HELEB

Xelkê taxên Şêxmeqsûd û Eşrefiyê yên Helebê ji pêş hola 8ˊê Adarê meşek li dar xist. Di meşê de wêneyên Rêber Abdullah Ocalan, wêneyên şehîdên Efrîn û gerîla hatin hildan. Her wiha pankartên ˊAzadiya fîzîkî ya Rêber Apo...misogeriya azadiya Efrîn û herêmên dagirkirî yeˊ, ˊli dijî dewleta Tirk a dagirker serî hildanˊ hatin hildan.

Meş li kolanên sereke geriya û li Çerxerêya Zeytûn a Eşrefiyê meş vegerî mîtîngê. Li wir endamê rêvebera HPCˊê Fehmî Hemîd li ser navê PYDˊê axivî û bêdengiya navneteweyî ya li hember qirkirina li Efrînê ji hêla dewleta Tirk a dagirker û çeteyên wê ve hat şermezarkirin.

Hevseroka Meclisa Malbatên Şehîdan Rewşan Mihemed jî axivî û bang li hêzên navneteweyî kir ku zextê li dewleta Tirk a dagirker bikin ku ji herêmên dagirkirî vekişin, kesên destên wan di sûc û binpêkirinên li dijî welatiyên Sûriyeyî de hene hesab bikin.

ŞEHBA

Der barê mijarê de koçberên Efrîn û Şehbayê li kolanên Fafînê geriyan, di destên wan de wêneyên Rêber Abdullah Ocalan, çiqilên zeytûnê û wêneyên şehîdên komkujiyan.

Li dibistana ajokariyê ya li Fafînê meş vegerî mîtîngê. Li wir endamê Meclisa Malbatên Şehîdan Mistefa Hesen berxwedana xelkê Efrînê silav kir.

Hesen wiha got: "Xelkê Efrînê bi vîna azad û berxwedaneke pîroz ji bo parastina rûmeta xwe li dijî êrişên dewleta Tirk a dagirker sekinîn."

Endamê Meclisa Rêveber a Rêveberiya Xweser a Kantona Efrîn û Şehbayê Muşîr Reşîd axivî û got: "Xelkê Efrînê li dijî êrişên dijmin di 58 rojan de berxwedaneke mezin raber kir, mîna Avêsta, Barîn Kobanê û şehîdên din ên Berxwedana Serdemê. "

Meş bi diruşma ˊBijî berxwedana Efrînêˊ bi dawî bû.

(fr)

ANHA