ʹHeta serkeftinê em ê têkoşînê bidomîninʹ

Ji bo sersaxiya malbatên endamên Tevgera Civaka Demokratîk (TEV-DEM) şehîd Mazlum Antep, Zelal Efrîn û Alaf Murad û şervanê Hêzên Rizgariya Efrînê (HRE) şehîd Zindan Efrîn (Hemîd Elo) li kampa Serdem a bajarokê Ehdas ê kantona Efrîn û Şehbayê kon hat vedan. Koçberên Efrîn û xelkê Şehbayê sersaxî da malbatên şehîdan. 

Di merasîmê de li ser navê Meclisa Malbatên Şehîdan a Kantona Efrîn û Şehba Xelîl Hemo axivî û got: "Dagirkeriya Tirk û ajanên wê çi bikin jî nikarin vîna me bişikînin. Em ê têkoşîn û berxwedanê heta pêkanîna serkeftinê û azadiyê dewam bikin."

Li aliyekî din jî endamê Meclisa Malbatên Şehîdan Elî Selame axivî û got: "Em sersaxiyê didin tevahî malbatên şehîdên me. Şehîdên me meşaleya ronahiyê ne ku rêya azadî û serkeftinê ronî dikin. Ew pêşengên me ne."

Endama Meclisa Kantona Efrîn û Şehba Ronahî Efrîn jî axivî û got: "Dijmin dixwaze komploya xwe ya li dijî Rêberê me û gelê me yê Kurd dewam bike. Her 4 şehîd şagirtên Rêbertî bûn. Em ê projeya Rêveberiya Xweser dewam bikin. Em ji xayînan re dibêjin hûn nikarin vîna gelê me yê berxwedêr têk bibin."

Rêvebera Meclisa Malbatên Şehîdan a Helebê Sûad Hesen teqezî bi dewamkirina berxwedan û têkoşînê heta pêkanîna serkeftinê kir.

Di dawiyê de wesîqeyên şehîdan hatin xwendin û radestî malbatên wan hatin kirin.

(fr)

ANHA