Xeznewî: Bi Rêveberiya Xweser û QSDˋê ve girêdayî bin

Meclisa bajarê Dirbêsiyê yê kantona Cizîrê ji bo nîqaşkirina geşedanên siyasî yên Sûriyeyê civîneke berfireh li bajêr li dar xist.

Di civînê de şêniyên bajêr, endamên sazî û meclisên xwecih, nûnerên partiyên siyasî yên Kurdî beşdar bûn. Her wiha di civînê de kurê şehîd Şêx Maşûq Xeznewî, Şêx Murşid Xeznewî û rêveberê Kongreya Îslama Demokratîk Ebdulkerîm Sarûxan beşdar bûn.

Di serî de Şêx Murşid Xeznewî li ser zehmetiyên li pêşiya şêniyên Bakur û Rojhilatê Sûriyeyê axivî û diyar kir ku berxwedan û fedakariya şêniyan bû bingeha Şoreşa 19ˋê Tîrmehê.

Xeznewî got: "Niha ji bo herêmê dîroka 100 salên bê tê nivîsandin. Ji bo wê jî yekbûn û berxwedan pêwist in. Divê em hebûna xwe îsbat bikin û şaşiyên berê dubare nekin."

Di dewama axaftina xwe de Xeznewî wiha pê de çû: "Pêwist e şêniyên Bakur û Rojhilatê Sûriyeyê destekê bidin projeya Rêveberiya Xweseriya Demokratîk û Hêzên Sûriya Demokratîk (QSD). Ji ber ku Rêveberiya Xweser û QSDˋê garantorên parastina destkeftiyên şoreşê ne."

ˋYEKITIYA AVA BIKIN Û DEV JI NAKOKIYÊN XWE BERDINˊ

Şêx Murşid Xeznewî bang li aliyên siyasî yên Kurdî kir ku dev ji nakokiyên xwe berdin û nêrînên xwe bikin yek, ji ber ku yekitî û berxwedan ji tevahî pêkhateyên herêmê re rêya tekane ya pêkanîna edalet û azadiyê ye.

ˋPEYAMA JI PÊŞEROJÊ REˊ

Şêx Murşid Xeznewî di dawiya peyama xwe de banga domandina têkoşînê û parastina destkeftiyên şoreşê kir û diyar kir ku fedakariya şêniyên Bakur û Rojhilatê Sûriyeyê dê ji bo nifşên nû bibe jêder û çavkaniya îlhamî û got: "Yekbûn û xebata hevbeş rêya pêkanîna pêşeroja aram û demokratîk in."

(mh/fr)

ANHA