Şênî gundê xwe hêşîn dikin

Şêniyên gundê Gewndekî Tayib ê navçeya Çilaxayê li dora kaniya gundê xwe darên fêkiyan diçînin û hewl didin dar û beran zêde bikin ku bi kêmbûna avê û qutkirina çeman re ji aliyê dewleta Tirk ve, tune bûbûn.

ROJANE

20 nîsan, 2024 07:35

QAMIŞLO

BESNA ŞEMO

Herêma Aliya ya di navbera Tirbesiyê, Girkê Legê û Çilaxayê de, bi kanî, bîr û xwezaya xwe ya bedew navdar e.

Piştî kêmkirina ava çeman ji aliyê dewleta Tirk ve û kêmbûna barîna baranê di çend salên dawîn de, gelek kanî miçiqîn û çem zuha bûn.

Di salên 1980 û 1990`î de tê bîra gelek şêniyan ku darên fêkî yên cuda li beravên çeman û dora kaniyan hatibûn çandin, mîna darên hejîr, bahîv, xox, hirmî û mişmişan, lê bi demê re ev dar nema dixuyin.

Bi barîna baranê re vê zivistanê, kanî ji nû ve derbûn. Yek ji wan jî Kaniya El Eswed (Reş) a li gundê Gewndekê Tayib ê li bakurê Çilaxa ye. Kanî navê xwe ji kevirên reş ên li dora wê girtiye.

Şêniyên gund û bi peydabûna avê re, careke din dest bi çandina darên fêkî li dora kaniyê kir.

Şêniyê bi navê Celal Hec Îbrahîm got ew hewl didin daran biparêzin û şînkahiyê zêde bikin.

Îbrahîm bang her kesî kir ku haj ji daran hebin û hawîrdoreke bedew û tendurist peyda bikin. Her wiha bi bîr xist ku plan dikin sûdê ji avê bigirin û projeyên wekî çewlika masiyan bi rêbaza kooperatîfê çêkin, ji bo ku şêniyên gund feydeyê jê bibînin.

(şx)

ANHA