Şehîd Hêvî Silêman li Qamişloyê hat oxirkirin

Meclisa Malbatên Şehîdan a bajarê Qamişloyê ji bo endama Koordînasyona Kongra Star a Efrîn-Şehbayê ku di vê dawiyê bûbû endama Koordînasyona Kongra Star a Kantona Cizîrê ya Bakur û Rojhilatê Sûriyeyê Hêvî Silêman, li Pakrewangeha Şehîd Delîl Saroxan a Qamişloyê merasîma oxirkirinê li dar xist. Hêvî Silêman di 28`ê Cotmeha 2025`an de, ji ber nexweşiya penceşêrê şehîd bibû. 

Bi sedan şêniyên bajarê Qamişlo û gundewarê wê, Kongra Star, Partiya Yekitiya Demokratîk(PYD), Rêxistinên Civaka Sivîl, Hêzên Ewlekariya Hundirîn, Kongra Îslama Demokratîk, koçberên Efrîn-Şehbayê û Yekîneyên Parstina Jin(YPJ) tev li merasîmê bûn.

Piştî deqeyek rêzgirtinê, li ser navê Meclisa Malbata Şehîdan a Qamişloyê endama Meclisa Taxa Şehîd Cûdî Şaziya Elî axivî û sersaxî ji malbata şehîd Hêvî Silêman re xwest.

Şaziya Elî anî ziman ku şehîd Hêvî bi fikir û felsefeya Rêber Abdullah Ocalan xwe fêr kir û mafê xwe weke jin nas kir. Hêvî sozek dabû Rêber Apo, ˋEw ê her kesî fêrî zimanê Kurdî bike, û wê ji mala xwe de dest pê bike û heya sax be wê gelê xwe fêrî zimanê Kurdî bikeˊ.

Şaziya Elî wiha got: “Mamosteya mezin û hêja em weke jin soz didin ku em ê şopdarê rêya te, rêya ronî û zanebûnê, bin.“

Endama Koordînasyona Kongra Star a Bakur û Rojhilatê Sûriyeyê Gulîstan Gulo axivî û tevahî şehîd bibîr anî, û got şehîd Hêvî ji malbatek welatparêz bû, xwedî îrade û baweriyek pir mezin bû, tu carî di nav kar û xebatan de dudilî nebû, rihê wê her tim ji bo ziman, nasname, azadiyê dijiya.

Gulîstan Gulo di dawiyê de got: “Çûna Hêvî ji me re windahiyeke mezin e, pêşenga jinan bû, em soz didin ku têkoşînê ji bo armancên wê û tevahî şehîdan mezin bikin."

Endamê Kongreya Îslama Demokratîk Şêx Omer El Hemîd jî diyar kir ku:“Şehîdên me xwedî nirxekî girnabiha ne û pîroz in. şehîd ew kesên ku xaka welat bi xwîna xwe avda û canê xwe feda kir."

Kurê şehîd Hêvî Silêman, Ferhad Silêman got: “Destpêkê sersaxiyê ji tevahî gelê xwe re dixwazim. Dayika min di oxira pêşxistina ziman û fêrkirina wê de berxwedanî û fedekariyek mezin da. Ez jî dibêjim dayê xewn û xeyala te pêk tê, êdî her kes bi zimanê xwe yê dayikê diaxive û dixwîne. Em bi şehadeta dayika xwe serbilind in û ji me re cihê şanaziyê ye.“

Di dawî de wesîqeya şehadetê hat xwendin û radestî malbatê hate kirin, heval û malbata Hêvî Silêman cenaze rakirin û spartin axê.

Hêvî Silêman kesayeta welatparêz, rewşenbîr bû, ji destpêka tevgera rizgariyê ve di salên 1982`an de dest bi kar û xebatên civakî, siyasî, dîplomasî û çandî kir.  Hêvî Silêman a ji Efrînê li bajarê Mabeta sala 1963`ji dayik bûye.

Hêvî Silêman di gelek qadan de cihê xwe girtibû û yek ji mamosteyên destpêkê ya zimanê Kurdî bû, ku ji 2000`heya 2012`an de mamostetî kir û ji 2012 heta 2025`an kar û xebatên siyasî kir.

Di malbata wê de xwişka Hêvî Silêman, Zozan Silêman a di sala 1988`an de tev li tevgera rizgariya Kurdistanê bûbû di sala 1993`yan de li deşta Silopiyayê şehîd bû. Her wiha dotmamên şehîd Hêvî, Zeyneb Silêman di sala 1991`an de li çiyayên azad, Emîne Silêman jî di 1992`an de li çiyayên azad, Xedîce Silêman di 1997`an li çiyayên azad, û Fatme Silêman li Efrînê li gundê Sorkê yê Racoyê sala 2016`an, şehîd bûbûn.

(ekîb/fr)

ANHA