Şehîd Bêrîtan li Beyrûtê hat bibîranîn

Rêxistina Kongra Star a li Lubnanê ji bo bîranîna fermandar şehîd Bêrîtan (Gulnaz Karataş) di salvegera 32'yemîn a şehadeta wê de panelek li dar xist. Di panelê de endamên Kongra Star, Kurdên Lubnanê û dostên wan ên Lubnanî beşdar bûn.

Di serî de sînevîzyonek li ser jiyana şehîd Bêrîtan hat pêşandan. Piştre endama têkiliyan a Kongra Star a Lubnanê Henan Osman li ser dîrok û têkoşîna jinên Kurd û çalakiya fedaî ya şehîd Bêrîtan a li dijî xiyanetê axivî.

Henan destnîşan kir ku şehîd Bêrîtan nimûneya jina azad, lehengî û berxwedanê bû û got: "Ji bo bersivdana şehadeta wê, Rêber Apo artêşa jinan di 1993ʹyan de damezrand."

Henan soza domandina têkoşîna ji bo azadiya jinan a li ser bingeha nirxên ku şehîd Bêrîtan danîne, nû kir û got: "Li kêlek hemû zehmetiyan, tevgera azadiya jinan û artêşa jinan îsbat kir ku jin dikarin guhartineke mezin di civakê de pêk bînin, ji ber wê em ê rêya şehîd Bêrîtan bişopînin, azadî û serkeftinê bi dest bixin."

Leyle Efrîn jî axivî û got: "Şehadeta şehîd Bêrîtan di dîroka têkoşîna jina Kurd de xaleke girîng bû. Ew nimûneya îsrar û lehengiyê bû. Ji bo azadiyê rihê xwe feda kir û îro, ji me re rêya azadî û edaletê ronî kir."

Panel bi diruşma ʹJin, Jiyan, Azadîʹ bi dawî bû.

(mh/fr)