Rûspiyên eşîrên Ereban peyama Rêber Abdullah Ocalan pêşwaz kir

Bi armanca ku peyama Rêber Abdullah Ocalan radestî eşîran were kirin, duh komîteyek hat avakirin. Komîte ji hevserokê Komîteya Însiyatîfa Azadiya Rêber Abdullah Ocalan parêzer Mihemed El Neîmî, endamê Meclisa Bajarê Til Hemîsê Mihemed El Şemerî, endamên Desteya Rûspiyan Fûad Al Başa û Hember Hesen, nûnerê Kongreya Îslama Demokratîk Mele Omer El Hemîd, şêwirmendên Rêveberiya Xweser a Kantona Cizîrê Şehnaz Şerîf û Kawa Qehreman, endamê Komîteya Têkiliyên Dîplomasî Hikmet Hebîb û seroka Desteya Jinan a Kantona Cizîrê Rohat Xelîl, pêk tê.

Endamên komîteyê duh êvarî li gundên Çilaxa, Girkê Legê û Qamişloyê peyama Rêber Abdullah Ocalan radestî rûspiyên qebîleya Şerabîn kir.

Endamên komîteyê li gundê Girê Ziraretê Çol peyama Rêber Apo radestî Şêx Muhsin Dawud El Finêtiş, li gundê  Erûr Şerabiye yê Girkê Legê peyam radestî Şêxê eşîra El Hemdûn El Şerabiye, Al El Hecî Mehmûd Ehmed El Hesen, li gundê Şemam jî radestî Şêx Salim Abdullah El Şemam û li gundê Sefayê jî radest Mihemed Ziyab El Ziyab kir.

Şêx û rûspiyan pêşwaziya diyalog û nêzîkbûna di navbera pêkhateyên etnîkî  de kirin û wekî gavek erênî ber bi pêşxistina ewlehiyê û kêmkirina aloziyan ve bi nav kir. Şêx û rûspiyan girîngiya hevgirtina Ereb û Kurdan vegotin û diyar kirin ku divê diyaloga avakar a bi pîvanên hurmeta li beramberî hev din dewam bike da ku armancên hevbeş ên aştî û pêşketinê bi cih werin.

Rûspiyên qebîleya El Şerabîn nerazîbûn nîşanî gotinên kîndarî û belavkirina fitneyê da ku bi rêya medyaya dîjîtal zêde bûye. Her wiha banga hevgirtin û hişyariyê kir. Rûspiyan di heman demê de piştgirî dan çareseriya siyasî ya li Sûriyeyê û parastina mafên tevahî pêkhateyan û diyar kirin ku ew bi QSD, YPJ  û YPG’ê re ne.

Eşîra anîn ziman ku ew bi rêgezên xwişk û biratiya gelan ve girêdadyî û li dijî tevahî cûreyên şer in û got: "Em aştî, ewlehî û azadiyê ji tevahiya Sûriyeyan re dixwazin. Her dilopek xwîna şehîdan me diêşîne.

Komîteyek din ji endamê Însiyatîfa Sûriyeyê ya Azadiya Rêber Abdullah Ocalan Ferzende Munzur, endama Koordînasyona Kongra Star Gulîstan Gulo, hevsroka Tevgera Civaka Demokratîk (TEV-DEM) Remziye Mihemed, endamê Însiyatîfa Azadiya Rêber Abdullah Ocalan Yûsif Mele, cigîrê hevserokên Kongreya Îslama Demokratîk Mazin Harûnî, endamê Partiya Yekitiya Demokratîk (PYD) Telet Yûnis û endamê Desteya Rûspiyan a Bakur û Rojhilatê Sûriyeyê Hesen Ferhan pêk tê, li Qamişloyê serdana qebîleya El Tey kir.

Endamên komîteyê serdana mîrê qebîleya Tey li Sûriyeyê Mihemed Ebdulrezaq El Tayî û hejmarek şêx û rûspiyên eşîrên Cewala, El Bû Asî, Benî Seba, Ziyabat, Kiyaxî, Meamîra, El Elyan û El Yesar ên qebîleya Tey kirin.

Rûspiyên qebîleya Tey pêşwaziya peyama Rêber Abdullah Ocalan kir û piştgiriya xwe bi QSD û pîvanên xwişk û biratiyê anîn ziman.

(bb)

ANHA