Rêveberiya Xweser niştecihên kampa Holê perwerde dike

Rêveberiya Xweseriya Demokratîk a Herêma Bakur û Rojhilatê Sûriyeyê bi rêya saziyên xwe hewldanên mezin li kampa Holê ya ku tê de malbatên DAIŞ'ê hene û li kampa Roj pêk tîne.

Rêveberiya Kampan a Rêveberiya Xweseriya Demokratîk ji bo jinûve rehabilitekirina wan malbatan li nava civakê, bidawîkirina tundrawiya wan û dûrxistina zarokan ji wî fikrî, dixebite.

Li kampa Holê ku kampa herî metirsîdar a cîhanê ye hejmara herî mezin a malbatên DAIŞ'ê heye. Rêveberiya kampê beşek mezin ji îmkanên xwe xistiye jinûve rehabilitekirina wan malbatan. Her wiha rêveberiyê, komele, rêxistinên herêmî û navneteweyî jî xistiye nava wê armancê.

Hevserokê rêveberiya kampa Holê Xorşîd Qiro destnîşan kir ku ew tevî hemû hevkarên xwe ji rêxistin, komeleyên herêmê û navneteweyî hewl didin rê li ber belavbûna tundrawiyê bigirin.

Der barê wê de Qiro wiha got: "Komeleyên girêdayî Rêveberiya Xweser bernameyên jinûve rehabilitekirina niştecihên kampê dikin. Em hewl didin komeleyên herêmî û rêxistinên navneteweyî jî ber bi wê yekê ve bikişînin. Ev jî beşeke biçûk e. pêdivî bi hewldanên mezin ên dewlet û NYˊyê heye. Divê lihevkirineke navneteweyî û herêmî li ser jinûve rehabilitekirina niştechên kampê hebe, da ku fikra DAIŞˊê ya li kampê têk bibin."

Qiro diyar kir ku tevî gefên rojane dîsa jî hewl didin zarokan û jinan rêxistin bikin û fikrê tundraw ji serê wan rakin.

Ji saziyên ku jinûve li ser rêxistinkirina malbatên kampa Holê dixebitin Meclisa Jinan a  Sûriyeyê ye. Ew hewl didin hemû jin û zarokên kampê derveyî beşa malbatên biyanî ji nû ve rehabilite bike. Meclis bi rêya semîner, derûnînasî û perwerdeyên pîşeyî hewl dide jinan ji fikrê tundraw bi dûr bixe.

Rêvebera Komîteya Kampan a Meclisa Jinan a Sûriyeyê û rêvebera programên hişyarkirin û rehabilitekirina jin û zarokên kampa Holê Cîhan Hemze axivî û wiha got: "Em di kampê de çalakiyên cihêreng û perwerdeyên rêxistinkirinê û yên pîşeyan li dar dixin da ku em wan ji rewşa derûnî ya xerab bi dûr bixin û fikrê tundraw ê ku wan girtiye jî rakin."

Girêdayî wê, Cîhan Hemze wiha domand: "Gelek gefên kuştinê li me tên xwarin. Li kêlek wê jî kona ku em tê de dixebitin dişewitînin. Her wiha jinên perwerde û bernameyên hişyarkirinê bi rê ve dibin di gefxwarinan re derbas dibin. "

Qiro diyar kir ku jinên DAIŞ'ê hewl didin wê tundrawiyê di zarokan de bi rêya (dersên şerîetê) biçînin û nûçeyên agahiyên nerast li nav kampê li ser programên rêxistinkirinê belav dikin. Her wiha hin jin û zarok kesên ,ji programên rêxistinkirinê sûd wergirin gefan li wan dixwin û hedef digirin.

(mh)

ANHA