Pêşangeha destkariyên jinan hat vekirin

Navenda Xizmetguzariya Civakî ya Desteya Kar û Barên Civakî û Kedkaran a Kantona Tebqayê pêşangeha hunerên destan û pêdiviyên zivistanê li Kafeteryaya Şems li navenda bajarê Tebqayê vekir. Bi 27 jinên ku ji kampa Holê vegeriyane, jinên koçber û jinên ji Tebqayê tev li pêşangehê bûn.

Di pêşangehê de xwarin û pêdiviyên zivistanê yên wekî penêr, mastê kemandî, rûnê erebî, tirşî û xwarinên din ên malê her wiha karên dirûtin, neqş, cil û berg û karên dest hatin pêşandan.

Rêvebera Navenda Xizmetguzariya Civakî li Kantona Tebqayê Hala Mihemed got: “Me ev pêşangeh ji bo piştgiriya jinên ku ji kampa Holê vegeriyan, jinên koçber û jinên ji civaka herêmê li dar xist, armanca me ew e ku jin ji hêla aborî û civakî ve werin bihêzkirin û kesên ku vegeriyane bi rêya projeyên piçûk û karên destan, di nav civakê de werin entegerekirin.”

Xewla El Casim yek ji beşdarên pêşangehê ye û berhemên xwe yên dirûtin û rîs nîşan daye, got: "Ev xebateke pir baş e, me jê gelek sûd wergirtiye, hem ji ber dan û standina ji bo pêşxistina karê xwe û hem jî dê bibe alîkar ku em ji bo avakirina jiyaneke baştir xwe bispêrin hêza xwe.”

(k)