‛Pêkhateyên herêmê ji bo biserxistina projeya Rêveberiya Xweser yekdest in’

PYD’ê di civîna li bajarê Girkê Legê de girîngî da parastina destkeftiyên Şoreşa 19’ê Tîrmehê û diayr kir ku pêkhateyên Bakur û Rojhilatê Sûriyeyê ji bo biserxistina projeya Rêveberiya Xweser yekdest in.

ROJANE

12 gulan, 2025 00:03

GIRKÊ LEGÊ

Partiya Yekitiya Demokratîk (PYD) li nivîsgeha Yekitiya Karkeran a Rimêlanê ya li bajarê Girkê Legê yê kantona Cizîrê civînek li dar xist. Di civînê de rûspiyên eşîrên Kurdî yên bajêr û gundewarê wî amade bûn.

Di civînê de geşedanên siyasî yên li Sûriye û Rojhilata Navîn hatin nîqaşkirin.

Di serî de endamê PYD’ê Silêman Xelef li ser guhartinên siyasî yên herêmê axivî û got Konferansa Yekrêzî û Yekhelwesta Kurdî li Rojavayê Kurdistanê ji bo diyarkirina helwesta Kurdî di Sûriyeya pêşerojê de, biryarên baş û girîng dan.

Xelef banga bidawîkirina dagirkeriya Tirk li ser xaka Sûriyeyê kir û girîngî da hevgirtina civakî li hemberî hewldanên têkbirina ewlehî û aramiya herêmê.

Xelef rola eşîrên Kurdî di parastina destkeftiyên herêmê de silav kir û got: “Pêkhateyên Bakur û Rojhilatê Sûriyeyê ji bo biserxistina projeya Rêveberiya Xweser yekdest in.”

(mh/fr)