"Mîrasa çandî li hember dagirkeran mertal e"

Di çarçoveya rêzesemînerên ji bo perwerdekirina şêniyên Minbicê ji hêla Yekitiya Rewşenbîran a Minbicê ve tên lidarxistin de, yekitiyê panel li dar xist. Di panelê de girîngiya mîrasa çandî li Minbicê û parastian wê hate nîqaşkirin.

Di panelê de endamên Rêveberiya Sivîl a Demokratîk a kantona Minbicê û partiyên siyasî û Yekitiya Rewşenbîran a Minbicê beşdar bûn.

Panel li nivîsgeha Mihemed Menla Xizêl a navenda bajêr li dar ket.

Di serî de hevserokê Yekitiya Rewşenbîran a Minbicê Ehmed El Yûsif axivî û got: "Minbic ji bajarên herî kevn ên Sûriyeyê ye ku dîroka damezirandina wê vedigere sala 2000'an berî zayînê û 3 navçe girêdayî wê ne, ew jî Ebû Qelqel, Xefse û Meskene ne. Ev bajar di serdema perestgeha kevin de ya ku hîn jî şopên wê li parka giştî ya Minbicê mane, gihîşt astên herî pêşketî."

Yûsif wiha domand: "Gelek sedemên girîngiya parastina kultûra çandî hene, yek ji wan nasnameya çandî ye. Parastina kultûrê beşek sereke ji nasnameya çandî ya bajêr e, ji ber ku adet û kevneşopiya bajêr temsîliyeta nasnameya wê ya çandî vediguhêzin."

Yûsif destnîşan kir ku her civakek xwedî çanda xwe ya taybet û mîraseke dîrokî ye ku ew dibin jêdera serbilindiya şêniyan, ji ber wê jî parastina kultûrê girêdana mirovan bi civak û nasnameya xwe ya niştîmanî xurt dike.

Yûsif wiha axivî: "Armanca vê semînerê xurtkirina girêdana çandî û pêşxistina girîngiya parastina nasnameya niştîmanî ye. Ji ber ku ne ji girêdana me ya bi dîrok û adetên me bûya dê dema me ya niha jî tune bûya."

Yûsif di dawiya axaftina xwe de got: "Dema ku em bi dîrok û adetên xwe ve girêdayî bin di encamê de civak hevgirtî dimîne û li hember dagirkerên ku dixwazin di aliyê çandî de herêmê dagir bikin dibe mertal, ji ber ku civaka ku ji dîrok û kultûra xwe bê dûrxistin ew tenê nav dimîne û bi demê re winda dibe."

(mh)