Mîhrîcana Rojava bi beşên nû dewam dike

Di roja 8`an a Mîhrîcana Rojava ya Çand û Hunerê de ku ji hêla Hevgirtina Rewşenbîrên Rojavayê Kurdistanê (HRRK) ve û li navenda HRRK`ê ya li bajarê Qamişlo tê birêxistinkirin, îro danê sibehê şanoya zarokan “Cuha û Qiralê Zeferan” ya ku bi derhênerî û amadekariya Welîd Omer e bi amadebûna zarokan hat pêşandan. Şanogerên bi navê Fewaz Mehmûd, Kawa Fetah û Xalid Omer şano pêşkêş kirin.

KOMXEBATA GUHERTINA DEMOGRAFÎK

Di danê êvarê de bi beşdarbûna endamên saziyên rewşenbîrî komxebatek di bin navê `guhertina demografîk li herêmên dagirkirî` bi kordînekirina endamê Navenda Lêkolînan a Firatê Welîd Çolî û beşdarbûna Kordînatorê Rêxistina Hevdestî ya Qurbaniyan li Bakur û Rojhilatê Sûriyeyê Orhan Kemal, berpirsa Dan û stendinê di Komeleya Leylûn a Qurbaniyan Zîlan Elî, Lêkolînerê di Rêxistina Pêl de Welîd Bekir û endamê Navenda Lêkolînan a Firatê Fadil Dawûd ve hat lidarxistin.

Di komxebatê de behsa mijara herêmên dagirkirî; Efrîn, Serêkaniyê û Girê Spî ji aliyê hiqûqî, sûcdarî û guhertinê ve hat kirin, beşdaran jî nerînên xwe bi hev re parve kirin.

Paşê di şevbuhêrka `Êvara Ava Mezin′ de helbestvanên ji bajarê Dêrikê yê Kantona Cizîrê yên bi navên; Diyala Elî, Rûken Elîşêr, Ebdulhelîm Ehmed Lawî, Ezedîn Silêman, Lorens Can, Melevan Resûl û Mehmûd Ebdo helbestên xwe gotin.

Piştî helbestan şanoyeke din bi navê `Durû` ku ji beşeke çîroka Entwen Tişîxof hatiye birin, bi amadekariya û derhêneriya Ebdulcabir Hebîb hat pêşkêşkirin. Şanogerên ku di şanoyê de beşdar bibûn  ev in; Ebdulmecîd Xelef, Alan Ebdullah, Mizgîn Îbrahîm, Ciwan Silo, Xebat Fendî, Hemam Hesen, Bilind Xelef û Ebulcabir Hebîb.

Şanoyê bal kişand ser durûtiya mirovan, li hemberî bûyeran û helwestên xwe li gorî berjewendiyên xwe diguherînin. Lîstoka xwe jî di şexsê polîsekê de pêk tîne.

Mîhrîcana 9′an a Rojava ya Çand û Hunerê ji 15`ê Kanûnê ve bi mijarên cuda bi rê ve diçe, sibe roja 9`an ji mihrîcanê ye dê semînerên der barê ziman, şevbuhêrka `Êvara Amûda Şewitî` û beşê sînemayê hebin.

(sb)

ANHA