Mazlûm Ebdî: Êrişa dijî dêrek Şamê êrişa ser hemû gelên Sûriyeyê ye
Fermandarê Giştî yê QSD’ê Mazlûm Ebdî êrişa li ser dêra li Şamê şermezar kir û got, "Ew êriş ne tenê li dijî Xiristiyanan e, lê li dijî hemû gelê Sûriyeyê ye."
Fermandarê Giştî yê Hêzên Sûriya Demokratîk (QSD) Mazlûm Ebdî êrişa DAIŞ’ê ya li ser Dêra Mar Elyas a li herêma Diwêla ya Şamê, ku di encamê de herî kêm 22 kes hatin qetilkirin, şermezar kir.
Ebdî li ser hesabê xwe yê X’ê sersaxî da malbatên qurbaniyan û got, “Mafên birayên me yên Xiristiyan hene, ku li welatê xwe bi ewlehî û aramî, bê tirs û gef bijîn."
Ebdî diyar kir ku êriş ne tenê Xiristiyanan, lê hemû gelê Sûriyeyê hedef girtiye û got: “DAIŞ ji bo hemû Sûriyeyê gef e. Şerê li dijî vê gefê berpirsiyariyeke neteweyî ye, ku hewldanên yekgirtî hewce dike. Em ê bi hemû biryardariya xwe ji bo parastina Sûriyeyê û gelê wê şerê xwe bidomînin."
Di êrişa çekdarî û bombeyî ya ku DAIŞ’ê di 22’ê Hezîranê de li ser dêra Mar Elyas a li herêma Diwêla ya Şamê kiriye, herî kêm 22 kes hatin qetilkirin û 63 kes jî birîndar bûn.
