Li Tebqayê têkildarî rola civaka sivîl di avakirina Sûriyeya nû de panele

Rêxistinên Civaka Demokrtîk ên kantona Tebqayê û Konfedraliya Rêxistinên Civaka Demokratîk a Herêma Bakur û Rojhilatê Sûriyeyê paneleke diyalogê bi navê "Rola civaka sivîl di damezirandina Sûriyeya nû de" li bajarê Tebqayê li dar xist. Di panelê de serokeşîr, rûspiyên eşîran, nûnerên deste û meclisên Rêveberiya Xweseriya Demokratîk û nûnerên yekitiyên xwecih beşdar bûn.

Di serî de hevseroka Rêxistinên Civaka Demokratîk ên kantona Tebqayê Huda Ewan li ser girîngiya diyaloga niştîmanî hemwextî rewşa zehmet a heyî û girîngiya beşdarbûna hemû pêkhayeyên Sûriyeyê ji bo avakirina pergaleke demokratîk li gorî hêviyên gelê Sûriyeyê, axivî.

MIJARA YEKEMÎN: MÎRASA PERGALA NAVENDÎ YA ZORDEST

Endamê Desteya Rêveber Fîras Cuma di mijara yekê de li ser bandora pergala navendî ya zordest a Sûriyeyê axivî û diyar kir ku siyasetên partiya Baas pêkhateyên Sûriyeyê ji cihên biryardayînê dûr dixistin, di encamê de jî têkilî û girêdanên civakî û aborî têk çûn û dewlet jî hilweşiya û got: "Divê civak li ser têgehên jiyana hevbeş û biratiya gelan werin hişyarkirin û perwerdekirin ku li hember rejîma navendî bisekine."

MIJARA DUYEMÎN: REWŞA HEYÎ Û ZEHMETIYÊN CIVAKA SIVÎL

Di mijara duyemîn de hevseroka Konfedraliya Rêxistinên Civaka Demokratîk a Bakur û Rojhilatê Sûriyeyê Nesrîn Hesen li ser zehmetiyên li pêşiya civaka sivîl hemwextî hilweşîna desthilata navendî û destwerdanên herêmî û navneteweyî axivî. Nesrîn Hesen diyar kir ku hêzên siyasî êdî li ser nasnameyên neteweyî û olî radibin, ev jî gefê li çalakvanên civaka sivîl dixwe û pêşî li serbixwebûna wan digire.

MIJARA SÊYEMÎN: PIRRENGÎ Û NENAVENDIYA DEMOKRATÎK

Hevserokê Konfedraliya Rêxistinên Civaka Demokratîk Cîhad Hesen di mijara sêyemîn de girîngî da pêkanîna pergala nenavnedî ya demokratîk ku mafên hemû pêkhateyan tê de parastî bin û banga xurtkirina aştiya civakî û jinûve avakirina têkiliyên civakî kir.

Encamnameya panelê:

Redkirina "Kongreya Diyaloga Niştîmanî" ya li Şamê, ji ber dûrxistina pêkhateyên Sûriyeyê û bandorbûna wê bi perspektîfên dewleta Tirk a dagirker.

Misogerkirina beşdarbûna hemû pêkhateyan di sazkirina destûra Sûriyeya pêşerojê de.

Teqeziya parastina yekbûna xaka Sûriyeyê û avakirina pergaleke nenavndî ya demokratîk.

Xurtkirina hevbeşiya civakî ji bo pêkanîna aramiya domdar.

Têkoşîna li dijî gendeliyê û piştgiriya azadiya giştî.

Vekirina kanalên diyalogê bi civaka sivîl a li tevahî bajarên Sûriyeyê re.

Misogerkirina vegera ewle ya koçberan.

Di dawiya panelê de beşdaran girîngî da yekkirina hewldanên ji bo derbaskirina zehmetiyan û avakirina Sûriyeya nû ya li gorî hêviyên pêkhateyên wê.

(mh/fr)

ANHA