Li Stasyona Elokê xebatên çaksaziyê

Ajansa ANHA’yê tevî Komîteya Xaça Sor û Rêxistina UNICEF’ê, ji 7 salan ve cara yekemîn e, ji bo şopandina xebatên çaksaziyê yên ku Şîrketa Avê ya Hesekê dike, derbasî Stasyona Elokê bû. Stasyonê bi awayekî demkî heta 5 rojan pompekirina avê rawestandiye û wê piştî xebatên çaksaziyê ji nû ve avê pompe bike.

Şîrketê di navbera 25 heta 29’ê vê mehê pompekirina avê radiwestîne, da ku xebatên çaksaziyê li xeta kişandinê û pevguhertina valveyên li Stasyona Hemê bi dawî bike.

Di gera ANHA’yê ya li stasyonê de, Gerînendeyê Stasyona Ava Elokê Omer Salim diyar kir ku ji bo xebatên çaksaziyê heta 5 rojan pompekirina avê ji bo Hesekê tê rawestandin.

Salim da zanîn ku xerabbûnên di boriyan û xeta kişandinê ya sereke de bandor li mîqdara avê ya pompekirinê û amadekariyan kiriye.

Salim anî ziman ku armanc ji çakasaziyê başkirina xebata pompekirinê û rêgirtina li ber herikîna avê ye û bal kişand ser xebatên zêdekirina hejmara pompeyan.

Li aliyekî din jî Serokê Daîreya Stasyonan a Hesekê Ebduletîf Mihemed jî got rawestandina pompekirinê li stasyonên Elok, Hemê û Ezîziyê ji bo bidawîbûna temenê pêxistinê ya 3 valveyên li stasyona Hemê pêk hat.

Mihemed destnîşan kir ku tîmên pîşesaziyê valveyek guhert û dest bi guhertina 2 valveyên dîtir kir û got xebat ji sedî 50 pêk hatiye û wê roja pêncşemê li gorî bernameya berê av were pompekirin.

Şîrketa Avê ya Hesekê ragihandibû ku ava Stasyona Elokê ji bo vexwarinê bikêrhatî ye.

(f)

ANHA