Li Minbicê îmze ji bo Rêber Abdullah Ocalan hatin komkirin

Komîteyên dilxwaz li Minbicê yên ji meclisên sivîl û komînan hatine avakirin, dest bi komkirina îmzeyên ji bo pêkanîna azadiya fîzîkî ya Rêber Abdullah Ocalan kir. Komkirina îmzeyan li bajêr dest pê kir û dê li tevahî gundewaran jî dewam bike. Ew yek di çarçoveya hemleya 9ˊê Sibatê hatiye destpêkirin de pêk hat.

Der barê mijarê de endamê Însiyatîfa Gel a Azadiya Rêber Abdullah Ocalan a Sûriyeyê Mihemed Husam El Şewax axivî û wiha got: "Dewleta Tirk a dagirker sûcên xwe li dijî Rêber Abdullah Ocalan zêde kirin. Ji ber baweriya gel û kesan bi fikir û felsefeya Rêbertî di 10ˊê Cotmeha par de pêngaveke cîhanî ji bo azadiya wî ya fîzîkî hate destpêkirin û gelên Bakur û Rojhilatê Sûriyeyê jî tev li vê pêngavê bûn."

El Şewax wiha domand: "Em beşdarî gelek çalakiyên ji bo azadiya fîzîkî ya Rêbertî bûn. Ji van çalakiyan komkirina îmzeyan e ku dê ji YEˊyê re were şandin. Ev hemle bi awayekî fermî di 17ˊê Sibatê de ji hêla Însiyatîfa Gel ve hate ragihandin."

El Şewax wiha pê de çû: "Ev hemle li ser komîteyan hate belavkirin. Di wan komîteyan de saziyên Rêveberiya Sivîl a Demokratîk a Minbicê hene û beşa mezin jî komîn e. Ji ber ku komîn nûnertiya piranî gel dike."

Yek ji xelkê Minbicê Hesen Hisên jî wiha got: "Em îro hatin da ku banga azadiya fîzîkî ya Rêber Abdullah Ocalan bikin û îmzeyên xwe biavêjin."

Hisên wiha dawî li gotina xwe anî: "Em şêniyên Minbicê heta pêkanîna azadiya fîzîkî ya Rêbertî dê tev li hemle û çalakiyan bibin."

(fr)

ANHA