Li Kobanê bi sedan kes li dijî êrişên dewleta Tirk meşiya

Li ser banga Rêveberiya Xweser a Kantona Firatê, bi sedan şêniyên kantonê bi meşekê êrişên dewleta Tirk a dagirker ên li ser binesaziya Bakur û Rojhilatê Sûriyeyê şermezar kirin. Meş ji Qada Jina Azad a li bajarê Kobanê dest pê kir.

Di meşê de pankartên bi nivîsên "Dewleta Tirk sûcên şer dûbare dike" û "Dewleta Tirk êrişî debara me ya rojane dike" hatin vekirin û dirûşmên "Na ji dagirkeriya Tirk re" hatin berzkirin.

Meş li Qada Şehîd Egîd veguherî mîtîngê. Li vir hevserokê Meclisa Rêveber a Kantona Firatê Mihemed Şahîn axivî û got, dewleta Tirka  dagirker armanc dike navendên stratejîk ên ku ximzeta pêşkêşî bi milyonan sûriyeyên li bakur û rojhilatê welat dike, tune bike. Şahîn diyar kir ku ev êriş beşek ji binpêkirinên dewleta Tirk e ku ji destpêka aloziyê ve li Sûriyeyê pêk tine û wiha domand: "Dewleta Tirk li Rojhilata Navîn roleke xerab û wêranker dilîze û siyasetên qirkirinê li dijî Kurdan dimeşîne."

Şahîn diyar kir ku ev êriş israra berxwedanê ya gelên herêmê têk nabe.

Artêşa Tirk a dagirker duh êvarî stasyonên petrolê yên Ewda û Seîda yên li Tirbespiyê û stasyona bana Şikeftê ya li Dêrikê kirin hedef. Di encamê de stasyona Ewda ji xizmetê derket û kehrebe li ser gelek gun û bajarokên Tirbespiyê, Çilaxa û Dêrikê qut bû.

(bb)

ANHA