Li Helebê rewşa siyasî û peymana 10`ê Adarê hate gotûbêjkirin

Li taxa Şêx Meqsûd a Helebê civînek berfireh hate lidarxistin. Nûnerên meclis, komîn, sazî, partiyên siyasî, Kongra Star û şênyên taxên Şêx Meqsûd û Eşrefiyê tev li civînê bûn.

Di civînê de, Endamê Fermandariya Giştî  ya QSD`ê Sîpan Hemo der barê rewşa siyasî de nirxandinek berfireh kir. Hemo pêşketinên dawî yên navxweyî û herêmî û bandora guhertinên siyasî li ser siberoja Bakur û Rojhilatê Sûriyeyê nirixand û bal kişand ser girîngiya rola saziyan di çareserkirina pirsgirêkên ewlehî û xizmetguzariyê de.

 Derbarê rêkeftina 10`ê Adarê ya di navbera hikûmeta veguhêz a Sûriyeyê û QSD`ê de, Hemo destnîşan kir ku ew pabendî peymana 10`ê Adarê ne û hewldanên wan ên ji bo gihîştina çareseriyek siyasî ya berfireh ku mafên hemû civakan pêk bîne, berdewam dikin. Hemo diyar kir ku aştî û demokrasî bijarteyek stratejîk e û mijara Efrîn dê di her danûstandin an rêkeftinên siberojê de mijara sereke be.

Hemo her wiha da zanîn ku gel kevirê bingehîn ê her pêvajoya guhertinê ye, û banga rêxistina civakê kir da ku karibe azadî û demokrasiyê bi dest bixe. Hemo wiha pê de çû, "Em alîgirên aştiyê ne, em ê bi her awayî bixebitin da ku vê rêyê biparêzin."

Sîpan Hemo bal kişand ser rola girîng a taxên Şêx Meqsûd û Eşrefiyê di parastina prensîbên Şoreşa 19`ê Tîrmehê de û berxwedana gel silav kir. Hemo bal kişand li ser girîngiya xurtkirina hevkariya di navbera meclisên sivîl û hêzên ewlehiyê de ji bo pêkanîna aramiyê û parastina civakê.

(k)