Li Çilaxa 37 şehîd hatin bibîranîn

Meclisa Malbatên Şehîdan a bajarê Çilaxa yê kantona Cizîrê ji bo bîranîna 37 şoreşgerên ku di mehên Çile, Sibat, Adar, Nîsan û Gulanê de li cihên cuda şehîd bûne, merasîmek li dar xist.

Merasîm li hola Navenda Çand û Hunerê ya bajarê Çilaxayê bi beşdariya endamên saziyên sivîl, xizmetguzarî, meclisa bajêr, nûnerên hêzên leşkerî û partiyan hat lidarxistin.

Endama Meclisa Malbatên Şehîdan a bajêr Kerîme Mihemed wesîqeyên şehîdan xwendin.

Dûre endama Meclisa Bajêrê Çilaxa Jiyana Mihemed diyar kir ku şehîdan ji bo azadiya gel û mafên wî, bê westan tê koşiyan û şehîd bûn.

Jiyan wiha domand: "Şehîdan dixwest azadiya fîzîkî ya Rêber Abdullah Ocalan bi dest bixin. Em ê jî li qadan bin heta ku vê armancê pêk bînin. Her wiha dixwestin destkeftiyên pêk hatine biparêzin, ji ber wê divê em jî wê biparêzin û ji nifşên bê re pêşerojeke baştir misoger bikin."

Jiyan êrişên duh ên dewleta Tirk a dagirker ên li dijî kantona Cizîrê ku di encamê de 4 şervanên QSD`ê şehîd bûn şermezar kir û got: "Ti kes nikare vîna me bişikîne. Êriş îsrara me ya pêkanîna xeyalên şehîdan zêde dike. Em ê biçin ser sendoqan û ewlehiyê li herêma xwe misoger bikin."

Di merasîmê de sinevîzyonek li ser perspektîfên Rêber Abdullah Ocalan ên têkildarî hevjiyana azad û jiyana 37 şehîdan hatin pêşandan.

(şx)

ANHA