Li Beyrûtê li ser têkoşîna dijî tundiya li ser jinan panel hat lidarxistin

Di Roja Têkoşîna Dijî Tundiya Li Ser Jinan a Cîhanê de Komîteya Jineolojî ya Rojhilata Navîn paneleke diyalogê li paytexta Lubnanê Beyrûtê li dar xist. Di panelê de nêzî 40 jinên Lubnanî û Sûriyeyî yên ji hemû komeleyên jinan ên Beyrût û Bekayê, beşdar bûn.

Di panelê de du mijarên sereke hatin nîqaşkirin, ew jî pênasekirina Jineolojî û tundiya li ser jinan bûn.

Di serî de rojnamevan û çalakvana civakî Marîna Selûm bixêrhatina beşdaran kir.

Mijara yekê ji aliyê endama Komîteya Jineolojî ya Lubnanê Alaa Fereh ve hat nîqaşkirin. Alaa Fereh bal kişand ser têgîna Jineolojî û bingehên wê û li ser stratejiya Jineolojî ya li Rojhilata Navîn a ji bo avakirina koalîsyoneke jinan û aşkerekirina rastiyên veşartî, axivî.

Mijara duyê ji aliyê çalakvana jinan û endama Hevgirtina NADA ya Rojhilata Navîn Xedîce El Husênî li ser girîngiya Roja Têkoşîna Dijî Tundiya Li Ser Jinan û girîngiya bidawîkirina tundiyê, axivî.

Piştre jinên beşdar tecrûbeyên xwe yên bi tundiya li ser jinan re vegotin û banga zêdekirina hevdîtinên wiha û panelan ji bo bilindkirina asta zanabûnê, kir.

Di dawiya panelê de spasname li beşdaran hatin belavkirin.

(mh)