Li 4 bajaran 4’ê Nîsanê hat pîrozkirin

Bi boneya 4’ê Nîsanê rojbûna Rêber Abdullah Ocalan, Partiya Kesk a Demokratîk bi hevkariya Meclisa Ciwanan a MSD’ê dar li Pakrewangeha Şehîd Dijwar a li gundê Dawiyê yê Hesekê çandin.

Bi heman armancê Meclisa Malbatên Şehîdan a bajarê Hesekê li Hola Serdem şahiyek ji zarokan re li dar xist. Bi dehan malbatên şehîdan û zarokên şehîdan beşdarî şahiyê bûn. Di şahiyê de diyarî li zarokan hatin belavkirin.

TIL TEMIR

Komîteya Jinan a Meclisa Malbatên Şehîdan a bajarê Til Temirê jî bi boneya rojbûna Rêber Abdullah Ocalan şahiyek ji zarokên şehîdan re li dar xist.

Piştî rêzgirtinê, rêvebera Komîteya Jinan Senaa Ebûd axivî û anî ziman ku dê şopdarên fikr û felsefeya Rêber Abdullah Ocalan bin.

Piştre komên hunerî yên zarokan hunerên xwe pêşkêş kirine û şêranî li beşdaran hat belavkirin.

TIL BIRAK

Meclisa Jinan a Meclisa Malbatên Şehîdan a bajarê Til Birakê jî bi heman boneyê daxuyaniyek li ber avahiya meclisê da. Hevseroka Meclisa Malbatên Şehîdan a Til Birakê Buşra Helûş daxuyanî xwend û bal kişand ser pergala îşkence û qirkirinê ku dewleta Tirk li ser Rêber Abdullah Ocalan dimeşîne. Buşra got armanc ji vê pergalê şikandina îradeya gelan e ku xwedî li ramanên Rêber Abdullah Ocalan derketine.

Di daxuyaniyê de hate destnîşankirin ku banga Rêber Abdullah Ocalan ji bo pêkanîna aştiyê li Rojhilata Navîn derfeteke rasteqîn e. Bang li rêxistinên hiqûqî yên navneteweyî jî hat kirin ku zextê li dewleta Tirk bikin bila Rêber Abdullah Ocalan û girtiyên azadiyê serbest berde.

ŞEDADÊ

Li bajarê Şedadê jî bi amadebûna şêniyên Şedadê, Deşîşe, Mergeda û Erîşayê şahiyek li pêşiya avahiya Meclisa Malbatên Şehîdan hat lidarxistin.

Bi navê Meclisa Malbatên Şehîdan Îman El Ferec axivî û diyar kir ku rojbûna Rêber Abdullah Ocalan rojbûna fikirê neteweyî ye ku ximzeta tevahî mirovahiyê dike. Her wiha got, ramanên Rêber Abdullah Ocalan rêya gelan ronî dike û çareseriyan ji aloziyan re dibîne.

Nûnerê PYD’ê yê Erîşayê jî anî ziman ku rojbûna Rêber Abdullah Ocalan rojeke îstisna ye ku di mercên zehmet ên ku gelên herêmê tê re derbas dibû, derket.

Şahî bi çalakiyên hunerî û belavkirina şîraniyan bi dawî bû.

(bb)

ANHA