Koordînasyona Jinan di civîna salê de xebatên xwe aşkera kirin

Civîn li hola civînan a Meclisa Rêveber hat lidarxistin. Tê de endama Desteya Seroketiyê ya Partiya Yekitiya Demokratîk (PYD) Foze Yûsif û koordînasyonên jinan ên rêveberiyên xweser û sivîl ên 7 kantonan, nûnerên komîte, nivîsgeh û tevger û rêxistinên jinan ên Herêma Bakur û Rojhilatê Sûriyeyê beşdar bûn.

Seroka Desteya Jinan a Rêveberiya Xweser a Herêma Bakur û Rojhilatê Sûriyeyê Edalet Omer rewşa siyasî nirxand û destnîşan kir ku li herêmê bûyer, peymanên nû û cuda têk pêkanîn û şer berfirehtir dibe ku bi xwe re di hevkêşeyên heyî de gelek guhertinan çêbike.

Edalet wiha domand: "Siyasetên dewleta Tirk a dagirker ên li herêmê ne li gor berjewendiya Amerîkayê ne, ji ber ku ew dixwaze xwe wek hêzeke leşkerî û aborî ya herêmî nîşan bide."

Piştre raporên salê ji aliyê koordînasyonên jinan ên rêveberiya xweser û sivîl ên 7 kantonan û komîte û nivîsgehên jinan ve hatin xwendin.

Di dawiya civînê de encamname ji aliyê Hevseroka Meclisa Rêveber a Rêveberiya Xweser a Herêma Bakur û Rojhilatê Sûriyeyê Bêrîvan Xalid ve hat xwendin.

Xalên herî girîng ên encamnameyê:

-Bilindkirin asta têkoşînê li hember hemû siyasetên li dijî jinan û têkbirina şerê taybet û şerê qirkirinê nexasim ên ji aliyê dewleta Tirk a dagirker ve.

-PIştgiriya Yekîneyên Parastina Jin (YPJ) bikin ku hêzeke parêzvan a rewa ye û di tunekirina DAIŞ`ê de rol lîstiye.

-Têkbirina hemû cûreyên tundiyê, zayendperestiyê û bazirganiya li ser mafên jinan ji aliyê pergalên zordest, baviksalar û kapîtalîst ve.

-Çalakkirina rola jinan di karê siyasî û biryargehan de.

-Danîna stratejiyekê ji bo hişyarkirina jinan û pêşxistina rewşa wan.

-Pêkanîna qanûnên girêdayî jinan nexasim qanûna malbatê.

-Lidarxistina panelan ji bo amadekirina hevpeymaneke taybet a jinan.

-Lidarxistina çalakiyan ji bo şîrovekirina qanûna parastina zarokan.

-Destekdayîna aboriya jinan û peydakirina derfetên kar.

-Meşandina siyaseteke ragihandinê ku bikeve xizmeta dozên jinan û bidawîkirina têgihên biçûkxistina jinan.

-Berfirehkirina çarçoveya têkilî û koordîneya bi tevgerên jinan ên xwecih û navneteweyî re.

-Destekdayîna tevgerên azadiya jinan ên li Efganistan, Rojhilatê Kurdistanê û Îranê û hemû tevgerên din.

-Lidarxistina konferansekê û şîrovekirina bendên girêdayî jinan ên di hevpeymana civakî de.

-Damezirandina mecliseke parastinê li ser asta Bakur û Rojhilatê Sûriyeyê.

-Lidarxistina panelên diyalogê li ser şantajên elektronîk.

-Amadekirina mîhrîcaneke hunerî û wêjeyî bi boneya Roja Jinan a Cîhanê (8'ê Adarê).

-Vekirina perwerdeyên rêveberî yên jinan bi koordîneya Desteya Jinan û Nivîsgeha Perwerdekirin.

-Belgekirina çîrokên jinan bi rêya belgefîlman û çapkirina pirtûkan li ser wan bi rêya Desteya Çandê û Desteya Jinan û Daîreya Ragihandinê.

-Vekirina projeyên biçûk ji bo destekdayîna jinên li kampan ji aliyê Desteya Karûbarên Civakî û Xebitandinê ve.

(mh)

ANHA