Kongra Star têkildarî azadiya Rêber Abdullah Ocalan civîn li dar xistin

Kongra Star a kantona Cizîrê di çarçoveya hemleya azadiya fîzîkî ya Rêber Abdullah Ocalan de li gelek bajar û bajarokên kantonê civînên girseyî li dar xistin.

LI DIRBÊSIYÊ BANGA BILINDKIRINA TÊKOŞÎNA JINAN

Li bajarê Dirbêsiyê Kongra Star li Navenda Çand û Hunerê civîneke girseyî li dar xist. Civîn bi deqeyeke rêzgirtinê ji bo şehîdan dest pê kir û piştre ji rêveberên Kongra Star Silava Simo destnîşan kir ku têkoşîna jinan di 52 salên dawîn de bûye çandeke berdewam û bal kişand ser girîngiya pêşengiya jinan di qonaxa pêş de.

Her wiha banga têkoşîna ji bo aştî û edaletê û azadiya fîzîkî ya Rêber Abdullah Ocalan hate kirin. Civîn bi guhdarkirina axaftinên Rêber Abdullah Ocalan bi dawî bû.

LI HOLÊ: RAMANÊN RÊBER ABDULLAH OCALAN HÊZ DA TÊKOŞÎNA AZADIYA JINAN

Li bajarê Holê bi beşdariya bi dehan jinên endamên saziyên Rêveberiya Xweser de li salona Partiya Yekitiya Demokratîk civînek berfireh hate lidarxistin.

Civîn bi pêşandana sînevizyona der barê jiyana Rêber Abdullah Ocalan de dest pê kir, piştre endama Koordînasyona Kongra Star a Hesekê Siham Mela Elî behsa girîngiya rola jinan di avakirina civakê de kir.

Her wiha ji bo nîqaşkirina felsefeya Rêber Abdullah Ocalan û rola wî ya di pêşxistina azadiya jinan de gotûbêj hate kirin.

LI TIL BIRAKÊ: AZADIYA FIZÎKÎ YA RÊBER ABDULLAH OCALAN JI BO GUHERTINÊ ŞERT E

Li Til Birakê jî jin li salona meclisa şaredariyê kom bûn. Piştî deqeyeke rêzgirtinê sînevîzyonek hate pêşandan.

Endama Koordînasyona Kongra Star Nahid Silêman destnîşan kir ku azadiya jinan û avakirina neteweya demokratîk bingeha edaleta civakî ye û got: "Azadiya fizîkî ya Rêber Abdullah Ocalan ji bo guhertinên radîkal şert e.”

LI TIL TEMIRÊ: LI GORÎ BANGA RÊBER ABDULLAH OCALAN TEV BIGERIN

Li Til Temirê jî di civîna ji rêveberên Kongra Star a kantona Cizîrê de Viyan Efrîn axivî û bal kişand ser girîngiya Banga Aştî û Civaka Demokratîk ku di 27’ê Sibatê de ji aliyê Rêber Abdullah Ocalan ve hatiye dayîn û bang li jinan kir ku li gorî vê bangê tev bigerin û heta azadiya fîzîkî ya Rêber Abdullah Ocalan dakevin qadan.

Civîn bi pêşandana sînevîzyona der barê jiyana Rêber Abdullah Ocalan de bi dawî bû.

LI HESEKÊ: DESTKEFTIYÊN JINAN GIRÊDAYÎ AZADIYA FÎZÎKÎ YA RÊBERTÎ NE

Li bajarê Hesekê 2 civînên gel li taxên El Kelasa û Xiwêran bi beşdariya jinên ji beşên cuda yên civakê hatin lidarxistin.

Endama Koordînasyona Kongreya Star Raperîn Nurhaq axivî û diyar kir ku Rêber Abdullah Ocalan her tim rola jinan di azadiya civakê de nirxandiye û got: "Parastina destkeftiyên şoreşa jinan bi mezinkirina têkoşînê û bidestxistina azadiya fîzîkî ya Rêber Abdullah Ocalan ve girêdayî ye."

Her du civîn bi pêşandana sînevîzyonên der barê ramanên Rêber Abdullah Ocalan ên li ser azadiya jinan û girîngiya birêxistinkirinê de bi dawî bûn.

LI ŞEDADÊ: RÊBER APO SEMBOLA TÊKOŞÎNA NAVNETEWEYÎ YE

Li Şedadê civîn li salona Navenda Çand û Hunerê bi amadebûna nûnerên saziyên sivîl û komîteyên civakî pêk hat. Civîn bi pêşandana sînevîzyona der barê jiyana Rêber Abdullah Ocalan de dest pê kir.

Ji rêveberên Kongra Star Emîra El Saad bal kişand ser girîngiya berdewamkirina çalakî û meşan heta azadiya Rêber Abdullah Ocalan. Her wiha bal kişand ser rola pêşeng a jinan di vê têkoşînê de.

Endama Komîteya Civakî ya Kantona Cizîrê Zehra El Elî destnîşan kir ku Rêber Abdullah Ocalan sembola têkoşîna navneteweyî ye û banga berdewamkirina têkoşînê kir.

(k)

ANHA