Konfederasyona Rêxistinên Civaka Demokratîk civîna xwe li dar xist

Meclisa Giştî ya Konfederasyona Rêxistinên Civaka Demokratîk a Herêma Bakur û Rojhilatê Sûriyeyê civîna xwe ya yekemîn li Hola Mişwar a li Reqayê li dar xist.

Endamên meclisê, endamên yekitiyên girêdayî wê, hevserokên meclisê, hevseroka Tevgera Civaka Demokratîk (TEV-DEM) Xerîb Hiso tev li civînê bûn.

Di civînê de guhertina navê konfedrasyonê hate erêkirin û bû “Konfederaliya Rêxistinên Civaka Demokratîk a Herêma Bakur û Rojhilatê Sûriyeyê”. Her wiha ji bo desteya konfederaliyê 4 endam û ji bo koordînasyonê jî 29 endam hatin hilbijartin. Di civînê de berpirsên nivîsgehên konferederaliyê jî hatin erkdarkirin.

Ji bo komîteya çavdêriya hundirîn jî 6 endam hatin hilbijartin.

Di dawiya civînê de plansaziya kar û xebatên bê ya konfederaliyê hate diyarkirin ku dê sazûmaniya nivîsgehên konfederaliyê bê temamkirin, konfederalî û rêziknameya wê ji tevahî saziyên Rêveberiya Xweser, yekitî, ode û komeleyên rêxistinên civaka demokratîk re bê şîrovekirin, ji bo nasandina konfederaliyê hemleyek bê lidarxistin, navenda konfederaliyê bê vekirin.

Kongreya Damezirîner a Konfederasyona Rêxistinên Civaka Demokratîk 31`yê Çileyê bi dirûşma "Bi hêza civaka birêxistinkirî em ê demokrasiyê, azadiyê û edaleta civakî bisepînin" hatibû lidarxistin.

(şx)

ANHA