Koçberên ji Efrînê ji bo vegera li malên xwe bi biryar in

Koçberên ji bajarê Efrînê ji ajansa me re axivîn û diyar kir ku ew her pabendî biryara vegera bajar û gundên xwe yên ku ev 7 sal e di bin dagirkeriya dewleta Tirk û çeteyên wê de ne.

Fîdan Mistefa der barê mijarê de got: "Veger mafekî rewa ye, ev 7 sal e ku em di koçberiyê de êş û azaran dikişînin û dagirker û çeteyên wî mal û milkên me dixwin. "

Fîdan Mistefa banga vegera ewle û aram kir û wiha dewam kir: "Bila niştecih vegerin warên xwe, em jî li gund û bajarên xwe vegerin, da ku her kes li ser axa xwe bi rûmet bijî.”

Zekiya Mihemed tekezî li ser pêwîstiya parastina nasnameya herêma xwe kir û got: "Dagirker çi qasî hewl bide bi rêya çeteyên xwe guhertinên demografîk pêk bînin jî, Efrîn wê nebe ya tu kesî.”

Zekiye Mihemed her wiha got: "Em 7 sal e koçber bûne. Tiştek ji jiyaneke bi rûmet li welatê me bi qîmettir nîne. Ev mafê me ye û em ê vî mafê bixwazin, bila dagirker û çeteyên wî derkevin. Ti karê wan li herêmên me tune ye, tu mafê wan tune li Efrînê bimînin. "

Ehmed Xelîl jî baweriya xwe ya vegera nêzîk anî ziman û got: "Baweriya me heye ku vegera Efrînê nêzîk e, ji ber ku Efrîn axa bav û kalên me ye, dergûşa çand û mîrata me ye û cihê jidayikbûna me ye. Em çi qas jê dûr bin jî em ê dev jê bernedin. "

Xelîl her wiha got: "Piştî rûxandina rejîma Baasê her kes vedigere ser mal û warên xwe, lê Efrînî ji vê kêfxweşiyê bê par man û dîsa ji Şahba û Til Rifetê koçber bûn. "

Ehmed Xelîl rewşa Efrînê yên beriya dagirkirinê û piştî dagirkirinê dan ber hev û wiha got: “Beriya ku ji aliyê artêşa Tirk û çeteyên wê ve were dagirkirin ji bo me bihuşt bû û ev jî bû sedema çavnebarî û dagirkeriya dewleta Tirk di sala 2018’an de.”

Dewleta Tirk a dagirker û çeteyên wê di 18’ê Adara 2018’an de herêma Efrînê dagir kir. Bi sed hezaran şêniyên resen ên Efrînê ber bi herêmên Şehbayê ve koçber bûn û trajediya koçberiyê di destpêka Kanûna sala borî de dubare bû, bi sed hezaran şêniyên Efrîn û Şehbayê piştî êrişeke din a dagirkeriya Tirk û çeteyên wê, neçar man ji herêmên Şehba û Til Rifatê ber bi rojhilatê Firatê ve koçber bibin.

(k)

ANHA