Ji ber bombebaranê aşxaneyeke sereke ya herêmê jî rawestiya

Di encama bombebarana dewleta Tirk a dagirker de duyemîn aşxaneya herî mezin a navçeya Amûdê ya kantona Cizîrê rawestiya. Ev dê bandor li hilberandina nan bike.

ROJANE

16 ÇILE, 2024 11:28

QAMIŞLO

SILAVA EBDUREHMAN

Balafirên dewleta Tirk a dagirker 14`ê Çileyê aşxaneya El Xêrat a li başûrê navçeya Amûdê ya kantona Cizîrê bombebaran kir. Ev aşxane li navçeyê duyemîn aşxaneya herî mezin e û pêdiviya ard a kantona Cizîrê û beşeke kantona Dêrazorê peyda dike.

Xwediyê aşxaneyê ku 2014`an hatiye avakirin, Ebdullah Dirbas got: "Dewleta Tirk dixwaze rewşa welatiyên herêma Bakur û Rojhilatê Sûriyeyê aloz bike."

Aşxaneya El Xêrat, rojane zêdetirî 50 ton ard hildiberand. Debara jiyanê ji zêdetirî 20 malbatî re peyda dikir ku piraniya wan ji Helebê, Dêrazor û Hesekê ne. Dirbas diyar kir ku nêzî 750 milyon lîre zirar bi aşxaneyê hatiye.

Ebdullah Dirbas wiha domand: "Herî kêm mehek gerek e heta aşxane dîsa bixebite. Ji ber wê, wê ard li herêmê kêm bibe û dê bi xwe re bandorê li hilberandina nan jî bike."

Di êrişa li ser aşxaneyê de 2 karker; Hisên Ayiş (45) ê ji Hesekê û Mihemed Xêr Ehmed Şêxî (23) ên ji Helebê birîndar bûbûn.

(şx)

ANHA