ENKS’ê der barê êrişên çeteyan de hişyarî da

Encûmena Nîştimanî ya Kurd li Sûriyeyê (ENKS) der barê êrişên hikumeta demkî yên li ser Rojava de daxuyaniyek weşand.

Di daxuyaniyê de hişyarî hate kirin ku berdewama êrişan û ferzkirina rewşeke bi hêzê li ser herêman Kurdan, dê aloziyê kûrtir bike û hêrsa gel zêdetir bike, di heman demê de dê rewşê ber bi senaryoyên xeternak ve bibe ku zehmet e were kontrolkirin û dê derfetên rasteqîn ên gihaştina çareseriyeke siyasî ya daîmî têk bibin.

ENKS’ê diyar kir "Her lihevkirineke girêdayî siberoja herêmên Kurdan nabe ewlehî û leşkerî tenê bin, di heman demê de divê rêgeheke siyasî ya zelal hebe ku mafên rewa yên gelê Kurd di destûrê de mîsoger bike û hevkariyeke nîştimanî ya rasteqîn di çarçoveya Sûriyeyeke demokratîk a pirreng de bide avakirin."

ENKS’ê di dawiya daxuyaniyê de bang li DYA, civata navneteweyî, Neteweyên Yekbûyî û tevahî aliyên têkildar kir û diyar kir: "Berpirsyariyên xwe yên exlaqî û siyasî pêk bînin, ji bo rêgirtina li ber rageşiyê xebateke cidî bikin, sivîlan biparêzin, dorpêça li ser Kobanê rake, av û kerebeyê bide wê, her wiha zemînekê ji bo diyalogên cidî û giştî ava bikin ku herêmê ji êş û herikîna xwînê dûr bixe.”

(b)