Têkildarî komkujiyên Sêfoyê panelek hat lidarxistin

Partiya Yekitiya Suryan li salona Kolbenkiyan a bajarê Qamişlo panelek bi navê `Sêfo di navbera bîr û edaletê de` bi rêxistin kir.  Hejmarek siyasetmedar, rewşenbîr, hiqûqnas û nûnerên saziyên sivîl tev li panelê bûn.

Piştî rêzgirtinê rojnamevan û çalakvana sivîl Hela Mîrza panel li ser 4 mijaran bi rêve bir.

DÎROKA KOMKUJIYA SÊFOYÊ

Mijara yekemîn a panelê bi navê ‘Dîroka komkujiyên Sêfoyê` ji aliyê nûnera Yekitiya Jinên Suryanî ya Sûriyeyê Îlham Metlî ve hat şîrovekirin. Îlham behsa dîroka komkujiyên Sêfoyê kir û got: "Sala 1860‘î li Lubnan û Sûriyeyê,  sala 1895‘an li Amedê,  sala1896‘an komkujiyên Sultan Abdulhemîd û 1909`an komkujiya Adena li ser gelê Xiristiyan hatin kirin."

Îlham Metlî bo jinên Suryanî ev tişt anî ser ziman: "Jinên Suryanî dikarin birînan derman bikin û civakê perwerde bikin. Divê jin ziman û dîroka xwe biparêzin û çanda Suryanî vejînin. Bi saya berxwedana jinên Suryanî dîrok ji neslekî veguhesî neslên dîtir."

SÊFO Û EDALATA PÊVAJOYA VEGUHÊZ

Di dewama panelê de lêkolînerê Navenda Lêkolînên Stratejîk a Suryanî Zuhêr Yûsif mijara duyemîn a bi navê "Sêfo û Edaleta Pêvajoya Veguhêz" şîrove kir. Zuhêr Yûsif destnîşan kir ku Sêfo ji bo gelê Suryan yek ji pêvajoyên herî giran û bi êş bû û wiha domand "Sala 1848`an dest pê kir û heyanî sedsala 20`emîn domand. Sêfo ne tenê serpêhatiyek dema borî ye, lê be sûceke qanûnî ye ku di qadên navneteweyî de hatiye belgekirin, da ku edalet pêk were û were mîsogerkirin ku careke din dûbare nebe, her wiha daxwaza bicihanîna mafên gelê Suryan were kirin."

FÊDE JI EZMÛNA ERMENIYAN GIRTIN

Mijara sêyemîn a bi sernavê `Sûdwergirtina ji ezmûna Ermeniyan ` ji aliyê  endamê Komîteya Têkiliyan a Dêra Ortodoks a Ermeniyan û Serokê Komîteya Şopandina doza Ermeniyan li herêma Cizîrê Hakûb Bersomiyan ve hat şîrovekirin.

Bersomiyan di destpêka axaftina xwe de wateya navê El Sêfo da naskirin û got: "Sêfo tê wateya şûr anku îfadeya kuştin, koçberî, wêrankirina dêran, mal û milkan. Ji ber erdnîgariyê, şer û mercan Ermen û Suryan li gelek herêman lihevdû kom bûn. Bi komî hatin kuştin û civaka wan ji hev hat parçekirin. Sedema komkujiyan ne tenê nakokiyên olî yê navbera Misilman û Ermeniyan de bû, lê sedemên wê yên neteweyî û siyasî jî hebûn."

ROLA CIVAKÊ Û ÇAPEMENIYÊ DI PIŞTGIRIYA SÊFO DE

Li ser mijara çaremîn a bi navê `Rola civaka sivîl û çapemeniyê di piştgiriya Sêfo de` rojnamevan Samir Hena axivî û got: "Dema komkujiya Sêfo pêk hat, çapemenî tine bû. Ji ber vê yekê gelek rastî negihîştin cîhanê. Piştî salan komkujî bi rêya şahidan hate belgekirin. Lê îro çapemenî bûye xeta yekemîn a parastinê. Belgekirina komkujiya Sêfo ne tenê ji dîroknasan tê xwestin, lê berpirsyartiyeke ji çapemenî, nivîskar, lêkolîner û rewşenbîran jî tê xwestin."

Di panelê de sûcên çeteyên DAIŞ û Osmaniyan bi roja îro ve dane girêdan. Hate gotin, Osmaniyan fermana komkujiyan li dijî Xiristiyan dan, ev sûcên wan werin belgekirin.

(np)

ANHA